जिल्ला समन्वय समितिलगायत डडेल्धुराका स्थानीय निकाय मिलेर कोरोना भाइरस परीक्षण गर्ने ल्याब स्थापना गर्ने भएका छन् ।
जिल्लाका दुई नगरपालिका र पाँचवटा गाउँपालिकाले आफू–आफू मिलेर आर्थिक लगानी गरी कोरोना भाइरस परीक्षण गर्ने ल्याब स्थापना गर्न लागेका हुन् ।
सुदूरपश्चिमको एक मात्रै सुविधासम्पन्न मानिएको र नाैवटै जिल्लाको केन्द्र मानिने डडेल्धुरा अस्पतालमा कोरोना भाइरस परीक्षण गर्न सक्ने ल्याब स्थापना गर्न स्थानीय तहले अभियान थालेका हुन् ।
कोरोना परीक्षण ल्याब निर्माण गर्न स्थानीय तहहरूको बैठकमा सातवटै स्थानीय तहले २० लाखका दरले रकम उपलब्ध गराउने र बाँकी रकमका लागि निजी क्षेत्रलाई अपिल गर्ने प्रस्ताव गरिएको अमरगढी नगरपालिका प्रमुख विशेश्वरप्रसाद ओझाले बताए ।
यस्तै सातवटै स्थानीय तहका ५२ वटा वडाबाट दुई लाखका दरले रकम संकलन गर्ने निर्णय गरिएको छ ।
त्यसैगरी जिल्ला समन्वय समितिमा रहेको संयुक्त कोषबाट एक करोड रुपैयाँ पनि ल्याब स्थापनाका लागि हाल्ने निर्णय भएको छ ।
नाैवटा जिल्ला रहेको सुदूरपश्चिममा एक मात्रै संघीय सरकारमातहत रहेको डडेल्धुरा अस्पताल सुविधासम्पन्न मानिन्छ ।
तर, अस्पतालमा सेवा सुविधा भने पर्याप्त छैन । ४२ जना विशेषज्ञ चिकित्सकको दरबन्दी रहेको अस्पतालमा अहिले आठजना मात्रै चिकित्सक छन् । तीमध्ये पनि दुईजना बिदामा छन् ।