विश्वका ६६ लाख शरणार्थी कोरोना भाइरसको उच्च जोखिममा
कोरोना भाइरस संक्रमणकाे रूपमा विश्वव्यापी फैलिएपछि विभिन्न देशमा रहेका शरणार्थी शिविरमा त्रास बढेको छ ।
ती शिविरहरूमा भाइरस संक्रमण निकै भयानक हुन सक्ने चेतावनी विज्ञहरूले दिएका छन् । सिरियादेखि बंगलादेशसम्म लाखौँ शरणार्थी छन्, उनीहरू शिविरमा आधारभूत सुविधाको अभावको सामना गरिरहेका छन्, जुन कोरोना भाइरसका लागि अनुकूल हुन सक्छ ।
संयुक्त राष्ट्र संघको तथ्यांकअनुसार विश्वभर ६६ लाख मानिस शरणार्थी शिविरमा छन् । संघका अनुसार हरेक दुई सेकेन्डमा विश्वमा मानिसहरू विस्थापित भइरहेका छन् । यो जनसंख्या सजिलै कुनै पनि महामारीको निशाना बन्न सक्छ ।
सिरिया
दशकौँदेखि चलिरहेको युद्धका कारण सिरिया र टर्कीको इडलिब प्रान्तका १० लाख विस्थापित मानिस शरणार्थी शिविरमा छन् । यी शिविरमा हात धुने पानी छैन, खानेपानीको समेत अभाव छ र सामाजिक दूरी कायम राख्न पनि यहाँ ठूलो चुनौती छ । आइसोलेसनमा राख्ने ठाउँ पनि छैन ।
यी शिविरमा स्वास्थ्य सेवा समयमै नपुगे भाइरसको संक्रमणबाट एक लाख शरणार्थीको मृत्यु हुन सक्ने चेतावनी स्वास्थ्य अधिकारीले दिएका छन् । गत साता पहिलोपटक त्यस शिविरमा परीक्षण किट पुगेको थियो ।
अहिलेसम्म त्यहाँ सबै परीक्षण नकारात्मक देखिएको छ । सिरियाका अस्पतालमा औषधि र उपकरणको पनि अभाव छ । उक्त शिविरमा भाइरस फैलियो भने निकै घातक हुने अनुमान गरिएको छ ।
बंगलादेश
सिरियाको जस्तै भयावह अवस्था बंगलादेशको कक्स बजारमा रहेका रोहिंग्या शरणार्थीहरूको पनि छ । शिविरमा बसोवास गर्ने करिब १० लाख रोहिंग्या शरणार्थी कोरोना भाइरस संक्रमणको उच्च जोखिममा रहेको बंगलादेशका अधिकारकर्मीले बताएका छन् । त्यहाँ अधिकांश रोहिंग्या मुसलमान सन् २०१७ मा म्यानमारको सैनिक आक्रमणपछि आएर बसेका थिए ।
बंगलादेशमा अहिलेसम्म कोरोना भाइरसबाट पाँचजनाको मृत्यु भएको छ भने संक्रमितको संख्या करिब ५० पुगेको छ । सरकारले मार्च २६ बाट १० दिनसम्मका लागि देश लकडाउन गरेको छ ।
त्यहाँ १० परिवारका लागि एउटा शौचालय छ, ५० परिवारका लागि एउटा ट्युबेल छ । ती शिविरमा सामाजिक दूरी कायम राख्नु असम्भवजस्तै रहेको, स्यानिटाइजर, मास्क विरलै देख्न पाइने अधिकारकर्मी बताउँछन् ।
संयुक्त राष्ट्र संघको शरणार्थी एजेन्सी युएनएचसिआरका अनुसार अहिलेसम्म उक्त शिविरमा भाइरसको संक्रमण देखिएको छैन । युएनएचसिआरले शिविरमा चार सय मानिस राख्न मिल्ने आइसोलेसन वार्ड र थप हजार शय्या बनाउने बताएको छ ।
योबाहेक बोसनिया, लेबनान र अफ्रिकामा शरणार्थीको संख्या धेरै छ । यी सबै शिविरमा भाइरसको संक्रमण फैलियो भने नियन्त्रण गर्न निकै गाह्रो हुने भन्दै चिन्ता व्यक्त गरिएको छ ।
शरणार्थीमा संक्रमण नफैलियोस् भनेर विश्व स्वास्थ्य संगठनले संयुक्त राष्ट्र संघका एजेन्सी र ती देशका सरकारसँग मिलेर काम गरिरहेको छ ।