कोरोना भाइरसको संक्रमण हुन नदिन सरकारले लागू गरेको लकडाउन उल्लंघन गर्ने २१ सय ३१ जनालाई मंगलबार प्रहरीले काठमाडौं उपत्यकाका विभिन्न स्थानबाट नियन्त्रणमा लिएको छ ।
बिहान ५ देखि १० बजेभित्रको समयमा लकडाउन उल्लंघन गर्नेको संख्या त्यति रहेको प्रहरीले जनाएको छ । अत्यावश्यकबाहेक सडकमा निस्केकालाई नियन्त्रणमा लिएको महानगरीय प्रहरी आयुक्त कार्यालयले जनाएको छ ।
प्रहरीले नियन्त्रणमा लिएकाहरूमध्ये १७ सय २४ जना पुरुष र चार सय सातजना महिला छन् । नियन्त्रणमा लिएकाहरूलाई चार घन्टा सार्वजनिक स्थानमा राखी छोड्ने प्रहरीले जनाएको छ । त्यस्तै लकडाउनको समयमा चलाइएका अत्यावश्यक सेवाबाहेकका ७३ वटा सवारीसाधनलाई ट्राफिक प्रहरीले नियन्त्रणमा लिएको छ ।
महानगरीय प्रहरी आयुक्तको कार्यालयले लकडाउन कार्यान्वयनका लागि काठमाडौं, ललितपुर र भक्तपुर प्रहरी परिसरलाई कडा रूपमा प्रस्तुत हुन निर्देशन दिएको जनाएको छ ।