प्रदेश मन्त्रीले गरे तरकारी तथा फलफूल बजार अनुगमन
कोरोना संक्रमण नियन्त्रणका लागि देश नै लकडाउन गरिएका वेला तरकारी तथा फलफूल आपूर्तिको अवस्था बुझ्न गण्डकी प्रदेशका उद्योग, पर्यटन वन तथा वातावरणमन्त्री विकास लम्साल आफैँ अनुगमनमा निस्केका छन् ।
बुधबार बिहान उनी प्रदेश अनुगमन टोलीसहित पोखराको तरकारी तथा फलफूल उपज बजार रानीवन पुगेका हुन् । झन्डै डेढ घन्टा तरकारी बजारमा बिताएका उनले आपूर्ति व्यवस्थापनबारे चासो राखेका थिए ।
विषम परिस्थितिमा पनि तरकारी र फलफूलको आपूर्ति व्यवस्थापन राम्रो पाएको उनले अनुगमनपछि प्रतिक्रिया दिए ।
तरकारी र फलफूलका विभिन्न स्टल अवलोकन गर्ने क्रममा व्यवसायीले आफूहरूले झेल्नुपरेका समस्याबारे मन्त्रीलाई जानकारी गराएका थिए ।
अनुगमनमा मन्त्रीसँगै कास्कीका सिडिओ ज्ञानबहादुर ढकाल, प्रदेश अनुगमन टोलीका संयोजक गोकुल शर्मा पौडेल, जिल्ला प्रहरी कार्यालय कास्कीका प्रमुख, प्रहरी उपरीक्षक दानबहादुर कार्की र उपभोक्ता मञ्च गण्डकीका अध्यक्ष कपिलनाथ कोइरालालगायत सहभागी थिए ।
तरकारी बजार खोल्ने समय थप दुई घन्टा बढाउन माग
तरकारी तथा फलफूल उपज बजार अनुगमन गर्न पुगेको टोलीलाई व्यवसायीहरूले बिहान तरकारी बजार खुल्ने समय केही बढाउन माग गरे ।
राति आउने फलफूल तथा तरकारी बिहान चार बजेदेखि झार्ने र ६ बजेसम्म जम्मा दुई घन्टासम्म मात्र खोल्दा समस्या भएको भन्दै उनीहरूले यसलाई बढाएर बिहान ८ बजेसम्म खोल्न दिन आग्रह गरे ।
व्यवसायी राजकुमार गुप्ताले बिहान चार बजे आउने सामान मिलाएर ६ बजेसम्म बेच्न नै नभ्याइने गुनासो पोखे । ‘रातिराति सामान आउँछ, ४ बजे खोलेर ६ बजेसम्म बेचिसक्नुपर्छ, भ्याइँदैन,’ उनले भने, ‘बजार पठाउन नपाएर फलफूल यहाँ कुहिने, तर बजारमा भने अभाव हुने अवस्था भयो ।’
व्यवसायीका गुनासो सुनेपछि सिडिओ ढकालले आपूर्ति व्यवस्थापनमा सहज बनाइने बताए ।
प्रदेश अनुगमन टोलीका संयोजक गोकुल शर्मा पौडेलले बजारको अवस्था सहज नै रहेको आफूहरूले पाएको बताए ।
उपभोक्ता मञ्च गण्डकीका अध्यक्ष कपिलनाथ कोइरालाले खुद्रा पसलेकोमा समस्या देखिएको प्रतिक्रिया दिए । ‘होलसेलमा समस्या छैन, खुद्रा र साना पसलेहरूले नै बढी मूल्य लिएर उपभोक्ता ठग्ने गरेको पाइयो,’ उनले भने ।