सुदूरपश्चिम प्रदेश सरकारले कोरोना संक्रमणको जोखिमलाई ध्यान दिएर धनगढी रंगशालामा टेन्ट लगाएर आइसोलेसन कक्ष निर्माण गरेको छ ।
आइसोलेसन वार्डका लागि नेपाली सेनाको टोलीले ३९ बेड भएका १९ वटा टेन्ट हाउस बनाएको हो ।
यस्तै, रंगशालाभित्र रहेको भवन र पूर्वतर्फको प्याराफिटको पछाडिसमेत गरी ७० वटा आइसोलेसन निर्माण गरिएको प्रदेश सरकारका सामाजिक विकासमन्त्री कृष्णराज सुवेदीले जानकारी दिए ।
उता कञ्चनपुरमा पनि एक सय २५ बेडको आइसोलेसन कक्ष र क्वारेन्टाइन निर्माण गरिएको उनले बताए ।
कोरोना संक्रमणका बिरामी भेटिए उपचारका लागि आइसोलेसन कक्ष निर्माण गरिएको मन्त्री सुवेदीले बताए ।
‘प्रदेश सरकार कोरोनाविरुद्धको लडाइँमा जुटेको छ । कोरोना संक्रमण देखिएमा तत्काल उपचार गर्ने व्यवस्थासहितको तयारी गरेका छौँ,’ उनले भने, ‘त्यसका लागि विभिन्न ठाउँमा आइसोलेसन वार्डहरू बनाइएका छन् ।’
करिब सात सयजनालाई आइसोलेसन र क्वारेन्टाइनमा राख्न सक्ने गरी तयारी गरिएको उनको भनाइ छ ।
कोरोना संक्रमणको जोखिमलाई मध्यनजर गर्दै जिल्ला प्रशासन कार्यालय कैलालीले अत्यावश्यकबाहेक सबै सेवा बन्द गर्ने निर्देशन दिएको छ ।