- वि.सं २०८१ बैशाख १४ शुक्रबार
प्रदेश नम्बर २ को नाम र स्थायी राजधानीको टुङ्गो लगाउन मंगलबार प्रदेश सभाको बैठकमा मतदान हुने भएकाे छ ।
बिहान ८ बजे बोलाइएको बैठकमा राजधानीको टुङ्गो लगाउन मतदान हुनेछ । मतदान सुरु हुनुअघि सांसदहरुले प्रदेशको नाम टुङ्गो लगाउने विषयमा बोलिरहेका छन् ।
प्रदेशको स्थायी राजधानी जनकपुरमा नै राख्न यसअघि सहमति भइसके पनि नामको विषयमा हालसम्म सहमति जुट्न सकेको छैन । नामका लागि अलग–अलग चार दलले तीनवटा प्रस्ताव गरेका छन् ।
सत्तारुढ राजपा र समाजवादीले ‘मधेस’, नेकपाले ‘जानकी’, प्रमुख प्रतिपक्षी कांग्रेसले ‘मिथिला भोजपुरा’ नाम प्रस्ताव दर्ता गराएका छन् ।
जनकपुरलाई राजधानीमा बनाउनमा यी चारवटै दल सहमत भएका छन् । वीरगञ्जका केही सांसदले भने प्रदेशको नाम ‘मध्य मधेस’ र राजधानी वीरगञ्ज प्रस्ताव गरेका छन् ।
सतारुढ समाजवादी पार्टीको ३०, राजपा नेपालको २५, प्रमुख प्रतिपक्षी नेकपाको ३२, अर्को प्रतिपक्षी कांग्रेसको १९ र संघीय समाजवादीको एक सिट गरी प्रदेश २ मा कुल १ सय ७ सांसद छन् ।
नाम र राजधानी तोक्न दुईतिहाइ बहुमत आवश्यक भए पनि नेकपा र कांग्रेसमा नामका विषयमा अलग धारणा रहेकाले प्रदेशको नामको टुङ्गो लगाउन गोप्य मतदान गरिने भएको हो ।
