लमजुङको क्व्होलासोंथर गाउँपालिका–१ बागलुङपानीदेखि वडा ३ को घलेगाउँसम्मको सडक कालोपत्रे हुने भएको छ । बागलुङपानीदेखि घलेगाउँसम्म १० किलोमिटर र घलेगाउँदेखि भुजुङसम्म सात किलोमिटर सडक कालोपत्रे हुने भएको हो ।
गण्डकी प्रदेश सरकारको भौतिक पूर्वाधार विकास मन्त्रालयअन्तर्गत पूर्वाधार विकास कार्यालय लमजुङमार्फत सडक कालोपत्रे गरिन लागेको पूर्वाधार विकास कार्यालय लमजुङका प्रमुख राम पराजुलीले जानकारी दिए । पराजुलीका अनुसार घलेगाउँदेखि भुजुङसम्मको सडक फराकिलो बनाइनुका साथै स्तरोन्नति गरिने भएको छ । पराजुलीका अनुसार कुल १७ दशमलव ६३ किलोमिटर सडक कालोपत्रे र स्तरोन्नति हुनेछ । उक्त सडक सात मिटर चौडाइको बन्नेछ । भ्याटसहित ३४ करोड ७७ लाख १४ हजार चार सय आठ रुपैयाँ ७९ पैसामा कालोपत्रे र स्तरोन्नति हुन लागेको हो ।
कालोपत्रे तथा ग्राभेलका लागि कान्छाराम–नाना जेभी काठमाडौंले ३० असोज ०७६ मा सम्झौता गरेको यो आयोजना दुई वर्षभित्र पूरा हुने बताइएको छ । क्व्होलासोंथर गाउँपालिकाका अध्यक्ष प्रेमबहादुर घलेले सडक कालोपत्रे भएसँगै विकास र समृद्धिमा सहयोग पुग्ने बताए ।
सडक कालोपत्रे भएसँगै स्थानिय उत्पादनले बजार पाउनेछ । गाउँपालिकाका अध्यक्ष घलेका अनुसार घलेगाउँसम्म कालोपत्रे सकिएसँगै भुजुङतर्फ अघि बढाइनेछ । भुजुङ–पसगाउँ जोड्न यस वर्ष ९० लाख बजेट छ । अहिले ग्राभेल घलेगाउँ सडक धमाधम कालोपत्रे बनाइँदै छ भने घलेगाउँदेखि भुजुङसम्मको बाटो स्तरोन्नति गरिनेछ ।