- वि.सं २०८१ बैशाख ८ शनिबार
डोल्पामा तीन दिनदेखि टेलिफोन सेवा अवरुद्ध बनेको छ । शुक्रबार दिउँसोदेखि मोबाइल र ल्याण्डलाइन सेवा अवरुद्ध भएपछि डोल्पा सञ्चारविहीन बनेको हो ।
जिल्लाको जगदुल्ला गाउँपालिकामा पर्ने मौरे लेकमा रहेको नेपाल टेलिकमको रिपिटर टावरमा समस्या देखिएपछि जिल्लाभर सञ्चार सेवा अवरुद्ध भएको दुर सञ्चार कार्यालय डोल्पाले जनाएको छ ।
रिपिटर टावरमा समस्या देखिएपछि ठूलीभेरी नगरपालिकामा पर्ने जुफाल, दुन, त्रिपुरासुन्दरी नगरपालिकामा पर्ने ल्होलगायतका स्थानमा राखिएका जि.एस.एम र सि.डि.एम.ए मोबाइल टावरहरु समेत अवरुद्ध भएका हुन् ।
मौरेमा अवरुद्ध टावर मर्मतका लागि जुम्लाबाट आवश्यक उपकरणसहितको प्राविधिक टोली पठाइ सकिएकाले मंगलबारसम्ममा सेवा सुचारु हुने नेपाल टेलिकम नेपालगन्जका कार्यकारी प्रमुख सिवराज खनालले बताए ।
दुइवटै मोबाइल सेवासँगै ल्याण्डलाइन टेलिफोन समेत बन्द भएपछि दुनै लगायत विभिन्न स्थानीय तहमा रहेका सरकारी तथा गैह्र सरकारी कार्यालयको कामकाजमा समस्या उत्पन्न भएको छ ।
