गोरखामा नेत्रविक्रम चन्द (विप्लव) समूहका जिल्ला सेक्रेटरीसहित दुई जना कार्यकर्ता पक्राउ परेका छन् ।
गण्डकी गाउँपालिका–४ फुजेलका कृष्ण पन्त (किरण) र दाङको तुलसीपुर उपमहानगरपालिका–५ का लोकबहादुर वली (दिनेश)लाई शनिबार पक्राउ परेको डिएसपी वासुदेव खतिवडाले जानकारी दिए ।
डिएसपी खतिवडाका अनुसार पन्त गोरखा जिल्ला सदस्य हुन् भने वली गोरखाका जिल्ला सेक्रेटरी हुन् । लामो समयदेखि खोजीमा रहेका उनीहरूलाई गोरखा नगरपालिका–१३ मझुवा देउरालीमा लुकिछिपी हिँडिरहेको अवस्थामा पक्राउ गरिएको प्रहरीले जनाएको छ ।
उनीहरूको साथबाट राजनीतिक प्रतिवेदन, पार्टीको झण्डा, नगद ३२ हजार, चन्दा रसिद, मोबाइल तीन थान र सिमकार्ड बरामद् गरेर थप अनुसन्धान भइरहेको प्रहरीले जनाएको छ ।