रुकुम पश्चिमको सानीभेरी गाउँपालिकाले यस वर्ष पनि गुरिल्ला म्याराथन गर्ने भएको छ । गाउँपालिकाले हरेक वर्ष फागुन १ गते गुरिल्ला म्याराथन संचालन गर्दै आएकोमा यस वर्ष भने फागुन २ मा हुने गाउँपालिकाले जनाएको छ ।
पहिलो र दोस्रो संस्करणमा पुरुष म्याराथन मात्र हुने गरेकोमा यस पटक भने महिला म्याराथन पनि संचालन हुने गाउँपालिका अध्यक्ष नरवहादुर पनुले जानकारी दिए ।
गाउँपालिकाले तत्कालिन द्धन्दका बेला माओवादी लडाकुहरुले प्रयोग गरेको बाटोमा म्याराथन संचालन गर्दै आएको हो ।
गत वर्ष भन्दा यस वर्ष म्याराथनको दुरी बढाईएको छ । गत वर्ष २२ किलोमिटर दुरीमा म्याराथन संचालन गरिएकाेमा यस वर्ष पुरुष म्याराथन ३२ किलोमिटर र महिला म्याराथन २५ किलोमिटर दुरीमा संचालन हुने गाउँपालिकाका अध्यक्ष पुनले जानकारी दिए ।
गाउँपालिकाको १ वडा कार्यालय सिम्ली बजारबाट सुरु हुने पुरुष म्याराथन मुसीकोट नगरपालिका १४ को छिवाङ ज्युला हुँदै सानीभेरी गाउँपालिका ३ को गरायला हुँदै मौराखारा पुगि त्यहाँबाट रुकुम पश्चिम र जाजरकोटको सिमाना रिम्ना झरेर सानीभेरी गाउँपालिकाको गिठाकोट, सहरेज्युला हुँदै पुनः सिम्ली बजारमै पुगेर सकिने छ ।
महिला म्याराथन पनि त्यही रुटमा संचालन हुने छ । तर महिलाहरु मौराखारा लेकमा भने पुग्नु पर्ने छैन् । महिला धावकहरु सानीभेरी गाउँपालिका ३ पेदिबाट मौराखारातिर नगई सिधै रिम्नातर्फ जाने गरी रुट निर्धारण गरिएको गाउँपालिकाले जनाएको छ ।
म्याराथनमा पुरुषतर्फका विजेताले ७५ हजार नगद, कप, मेडल र प्रमाण पत्र, उप विजेताले ५० हजार नगद, मेडल र प्रमाण पत्र तथा दुई जनाले शान्त्वना स्वरुप १०/१० हजार नगद, मेडल र प्रमाण पत्र प्राप्त गर्ने छन् ।
त्यस्तै महिलातर्फका विजेताले नगद ५० हजार, कप, मेडल र प्रमाण पत्र, उप विजेताले नगद ३५ हजार, मेडल र प्रमाण पत्र प्राप्त गर्ने छन् । दुई जनालाई शान्त्वना स्वरुप नगद १०/१० हजार, मेडल र प्रमाण पत्र प्रदान गरिने छ ।