कलंकीमा दुर्घटनागरी भागेका टिपर चालक सिन्धुपाल्चोकबाट पक्राउ
कलंकीको अण्डरपासमा बुधबार राति मोटरसाइकललाई ठक्कर दिएर भागेका टिपर चालक अनिल लामालाई प्रहरीले शुक्रबार सिन्धुपाल्चोकबाट पक्राउ गरेको छ ।
बुधबार राति साढे १२ बजे बल्खुबाट सितापाइला जाँदै गरेको बा ४ प ८५६९ नम्बरको टिपरले विपरित दिसाबाट आएकोे प्रदेश–०२–०३–००४ प ५५० नम्बरको मोटरसाइकललाई ठक्कर दिएको थियो । ठक्करबाट मोटरसाइकलमा सवार मुन्ना चौधरी र रमेश चौधरीको घटनास्थलमै मृत्यु भएको थियो । उनीहरु रौतहट घर भई बल्खुमा मोटरसाइकल वर्कसप संचालन गर्दै आएका थिए ।
महानगरीय प्रहरी परिसर काठमाडौंका प्रवक्ता होविन्द्र बोगटीले दुर्घटनापछि भागेका टिपर चालक लामालाई सिन्धुपाल्चोक चौताराबाट पक्राउ गरिएको बताए ।
लामाले तिब्र गतिकाे कारण दुर्घटना भएको प्रहरीलाई बताएका छन् । लामालाई महानगरीय प्रहरी वृत्त कालिमाटीमा राखि अनुसन्धान भइरहेको बोगटीले जानकारी दिए ।