गृहमन्त्री रामबहादुर थापाले गृहसचिवबाट राजीनामा दिएका प्रेमकुमार राईलाई नयाँ जिम्मेवारीमा पठाउने तयारी भएकाे बताएका छन् । मन्त्रालयमा सोमबार राईको बिदाइ कार्यक्रममा थापाले यस्ताे खुलासा गरेका हुन् ।
२२ महिना गृहसचिवको जिम्मेवारी सम्हालेका राईले आइतबारदेखि लागु हुने गरी राजीनामा दिएका थिए । ‘उहाँ गृहसचिवबाट मात्रै बिदाइ हुनु भएको हो,’ गृहमन्त्री थापाले भने, ‘उहाँलाई नयाँ अभियान, नयाँ सेवा र नयाँ जिम्मेवारीमा पठाउँदै छौँ ।’ गृहमन्त्री थापाले विशेष जिम्मेवारी दिइने घोषणा गरेसँगै राईलाई अख्तियार दुरुपयोग अनुसन्धान आयोगमा पठाउने तयारी भएकाे अनुमान गरिएकाे छ । थापाले राईको इमान्दारी, योग्यता र राष्ट्रप्रेमका कारण मन्त्रालयले धेरै सफलता पाएको बताए ।
बिदाइ कार्यक्रममा सचिव राईले गृहमन्त्री र मन्त्रालयका अन्य कर्मचारीहरुको सहयोगबाट २२ महिनामा धेरै सुधारका काम गरिएको उल्लेख गरे । प्रशासन सुधार, सुशासन कायम गर्न, प्रहरी प्रशासनमा लामो समयदेखिको बढुवा प्रकृयालगायत सुधारका काम आफ्नो कार्यकालमा भएको उनले बताए । उनले अवकाश हुनुभन्दा ३ दिनअगाडि राजीनामा दिएका थिए ।