अस्ट्रेलियामा विगत ६ महिनादेखि लागेको आगालागीमा परी अहिलेसम्म करिब एक करोड जीवको मृत्यु भइसकेको छ । तर 'न्यू साउथ वेल्स'को पहाडमा एक प्रकारको शंखेकिरा जिवित फेला परेको छ । शंखेकिरा फेला परेको स्थान आगोलागीमध्ये सबैभन्दा बढी प्रभावित क्षेत्र मानिएको छ ।
उक्त शंखेकिरा विश्वमा 'न्यू साउथ वेल्स'को एक पहाडमा मात्रै पाइने समाचारमा जनाइएको छ । यसभित्र पनि तीन प्रजाति रहेका छन्, जुन सबै मांसाहारी हुन् । यो जीव सन् २०१३ मा पहिलो पटक देखिएको थियो । यसको लम्बाई करिब २० सेन्टिमिटर हुन्छ ।
आगोलागीले १८ हजार हेक्टरको क्षेत्रफलको जंगलमा पूर्ण क्षति पुगेको थियो । तर, 'नेसनल पार्क्स एण्ड वाइल्ड सर्विस'का कर्मचारीले उक्त शंकेकिरा ६० स्थानमा देखेको जनाएका छन् । एक कर्मचारी फ्रान्क कोहलरका अनुसार शंकेकिरा पर्वतको चट्टानी क्षेत्रमा देखिएको हो । आगोले करिब ९० प्रतिशत जंगल नष्ट गरे पनि उक्त शंखेकिरा देखिएपछि कर्मचारी अनौठोमा परेका थिए ।
आगोले पर्यावरणमा कति नोक्सान पुर्यायो ?
पछिल्लो हप्तामा प्रकाशित पर्यावरण तथा ऊर्जा विभागको आँकडाअनुसार ४९ प्रतिशत जीव, ८० प्रतिशत पानीमा बस्ने जीव नष्ट भएको छ । यस्तै, आगोले ६५ प्रतिशत प्रजातिहरूको आवासमा संकेट परेको छ ।
आगोले १६ प्रकारको जंगली जनावर, १४ प्रकारको भ्यागुता, ९ प्रकारको पंक्षी, ७ प्रकारको घर्सिने जीव, ४ प्रकारको किरा र ४ प्रकारको माछा तथा एक प्रकारको माकुरा पूर्ण रूपमा नष्ट भएको छ । आगोमा परी अस्ट्रेलियामा मात्रै पाइने कोआला प्रजातिको जीव बढी मात्रामा नोक्सान भएका छन् । न्यू साउथ वेल्समा मात्रै ८ हजार कोआला र ३० हजार कंगारू मरेको हुन सक्ने अनुमान गरिएको छ ।
- एजेन्सी