बिहीबार टिपरको ठक्करबाट युवतीको मृत्यु भएपछि स्थानीयले पूर्वपश्चिम राजमार्गअन्तर्गत कञ्चनपुरको भीमदत्त नगरपालिका ४ महेन्द्रनगर चौमन्न चोकमा अवरोध सिर्जना गरेका छन् ।
मृतक अध्ययनरत जनज्योति बहुमुखी क्याम्पसका विद्यार्थीले शुक्रबार बिहानैदेखि आन्दोलन गरेका हुन् ।
उनीहरूले पूर्वपश्चिम राजमार्गको भाँसी क्षेत्रमा सवारीसाधन सञ्चालनमा रोक लगाएका छन् । विद्यार्थीहरुले पीडित परिवारलाई न्याय, घटनाको सत्यतथ्य छानबिन र दोषीलाई कारबाहीको माग गर्दै आन्दोलन गरेको बताएका छन् ।
कञ्चनपुरका राजनीतिक दलसहित विभिन्न विद्यार्थी संगठनले घटनाको विरोध गर्दै पीडित परिवारलाई उचित क्षतिपूर्ति माग अघि सारेका छन् । से१क ८८७ नम्बरको टिपरको ठक्करबाट हिजो दशरथचन्द नगरपालिका १ गुरुखोलाकी २० वर्षीया युवती रमिता भट्ट(रोशनी)को घटनास्थलमै ज्यान गएको थियो ।
साइकलमा सवार रमितालाई टिपरले ठक्कर दिएर पछाडिको पांग्राले टाउको किचिदिएको पत्यक्षदर्शीले बताएका छन् । स्थानीयले टिपर आतंक बढ्ेको भन्दै टिपरमाथि ढुंगामुढा प्रहार गरेका थिए ।
आगजनीको प्रयास भए पनि उल्लेख्य मात्रामा सुरक्षाकर्मी घटनास्थल पुगेपछि टिपरलाई प्रहरीले घेरा हालेर जाेगाएकाे थियो । स्थानीयको ढुंगामुढाबाट चार प्रहरी घाइतेसमेत भएका थिए। घाइते हुनेमा भगवती भट्ट, सन्तोषी जोशी, लोचन चन्द, गणेश बोहरा छन् । उनीहरूको महाकाली अस्पतालमा उपचार भइरहेको छ ।