भारतका प्रधानमन्त्री नरेन्द्र मोदीले यो वर्ष (आगामी पुसभित्र) नेपाल भ्रमण गर्ने बताएका छन् ।  विराटनगरमा भारतीय सहयोगमा निर्मित एकीकृत जाँचचौकी (आइसिपी) उद्घाटनपछि भिडियो कन्फरेन्सलाई मंगलबार सम्बोधन गर्ने क्रममा प्रधानमन्त्री केपी शर्मा ओलीले निमन्त्रणा सम्झाए । मोदीले नेपाल भ्रमणको कार्यक्रम बनाइरहेको जवाफ दिए । नेपालले २० देखि २२ सम्म गर्न लागेको अन्तर्राष्ट्रियस्तरको सगरमाथा संवाद कार्यक्रम र आगामी वैशाख २५ गते बुद्ध जयन्तीमध्ये एक अवसरमा मोदीको भ्रमण गराउने इच्छा व्यक्त गरेको छ । 

‘भारतका प्रधानमन्त्रीज्यूलाई नेपाल भ्रमणका लागि स्ट्यान्डबाई निमन्त्रणा छ । उहाँले २०२० भित्र आउने भन्नुभएको छ । उहाँले सगरमाथा संवाद र वैशाख पूर्णिमामध्ये एउटा अवसरमा भ्रमण गरिदिनुभयो भने राम्रो हुन्छ भन्ने हामीलाई लागेको छ,’ प्रधानमन्त्रीका परराष्ट्र मामिला सल्लाहकार डा. राजन भट्टराइले नयाँ पत्रिकासँग भने, ‘यसबाहेक उहाँको अनुकूल कुनै पनि समयमा स्वागत गर्न नेपाल सरकार प्रतिक्षारत छ । कूटनीतिक च्यानलमार्पmत उहाँको भ्रमणका लागि परराष्ट्र मन्त्रालयले कुराकानी गर्नेछ ।’

 भट्टराईको बुझाइमा जलवायु परिवर्तनको विषय नेपाल र भारतको साझा भएकोले मोदीले त्यससम्बन्धी सगरमाथा संवादमा सहभागी जनाइदिए प्रभावकारी हुने विश्लेषण नेपालको छ । सगरमाथा संवादमा सरकारले मोदीसहित २० देशका कार्यकारी प्रमुखलाई निमन्त्रणा गरेको छ । मोदीले पहिल्यै घोषणा गरेअनुसार लुम्बिनीको भ्रमण गर्न बाँकी हुनाले बुद्ध जयन्तीमा लुम्बिनी भ्रमण गर्ने इच्छा राखेमा पनि नेपालले त्यसको तयारी गर्नेछ । मोदी लुम्बिनी भ्रमणमा आए गौतम बुद्धको जन्म नेपालमा भएको भन्ने सन्देश अन्तर्राष्ट्रिय रूपमा पुनः प्रवाहित हुने नेपालको बुझाइ छ । 

मोदीले आफूलाई प्रधानमन्त्री ओली र नेपाली जनताको स्नेहले तानेको बताए । करिब ९ मिनेट लामो सम्बोधनमा मोदीले भने, ‘मलाई नेपाल भ्रमणका लागि दिनुभएको निमन्त्रणाप्रति गर्व महसुस गरेको छु । तपाईं  (ओली) र नेपाली जनताको स्नेहले मलाई तानेको छ । म कार्यक्रम बनाइरहेको छु र निश्चय नै तपाईंको साथमा समय व्यतित गर्नेछु ।’  उनीभन्दा पहिला करिब ७ मिनेट बोलेका प्रधानमन्त्री ओलीले चाँडै नै आफ्नो सुविधाअनुसार नेपाल भ्रमण गर्न मोदीलाई स्मरण गराएका थिए । ‘तपाईंलाई नेपालमा स्वागत गर्न म प्रतिक्षारत छु । तपाईंको भ्रमणले हाम्रो दुई देशबीच भएका उपलब्धिको समीक्षा गर्ने र भविष्यका लागि नयाँ कार्ययोजना बनाउने अवसर दिनेछ,’ प्रधानमन्त्री ओलीको भनाइ थियो । प्रधानमन्त्री ओलीले १७ जेठमा प्रधानमन्त्री मोदीको शपथग्रहण समारोहपछि भएको भेटमा नेपाल भ्रमणका लागि निमन्त्रणा दिएका थिए ।

 मोदीले नेपालको चौतर्फी विकासमा नेपालको चाहनाअनुसार भारतले सहयोग गर्दै आएको स्मरण गर्दै भने, ‘हाम्रो छिमेक प्रथम नीति भनेको छिमेकमा सीमापार कनेन्टिभिटी बनाउने हो । हाम्रो सम्बन्ध छिमेकीको मात्र होइन, इतिहास र भूगोलले हामीबीच प्रकृति, परिवार, भाषा, संस्कृति र अनेकौँ नजानिँदो धागोले हाम्रो जीवनलाई जोडेको छ र हाम्रो हृदयबीच नयाँ बाटो खुलेको छ ।’ कनेक्टिभिटीले दुई देश मात्र नभएर क्षेत्रीय विकासलाई नै जोड्ने मोदीको भनाइ थियो । मोदीले छिमेकका सबै मित्रदेशबीच आवागमन सरल र सुचारु बनाउन प्रतिबद्धता पनि जनाएका छन् । 

प्रधानमन्त्री ओली भिडियो कल कन्फरेन्समा सुरुमा बोलेका थिए । ओलीले मोदीको कार्यकालमा नेपाल–भारत सम्बन्ध नयाँ उचाइमा पुगेको भन्दै अब बाँकी विषय समाधान गरौँ भनेका थिए । ओलीपछि बोलेका मोदीले ओलीको प्रशंसा गरे, तर यसबारे जवाफ दिएनन् । ‘दुई देशका जनताको हितमा तपाईंसँग सहकार्य गर्न म इच्छुक छु, पछिल्लोपटक नेपाल–भारत सम्बन्ध नयाँ उचाइमा पुगेको छ,’ भूमिका बाँध्दै ओलीले भने, ‘अब दुई देश र जनताको हित हुने गरी हाम्रा बीचका सबै बाँकी विषयलाई संवादमार्फत समाधान गर्ने समय आएको छ ।  दुवै देशमा अहिले बलियो र स्थायी  सरकार छन् ।

मोदीले यसबारे केही जवाफ दिएनन् बरु ओलीको तारिफमा समय खर्च गरे र शीघ्र स्वास्थ्य लाभको कामना गरे । ओलीले यसका लागि धन्यवाद पनि दिए । ‘केही वर्षयता तपाईंको सहयोगमा भारत–नेपाल सम्बन्धमा अभूतपूर्व प्रगति देख्ने अवसर मिलेको छ,’ मोदीले भने, ‘हाम्रा बीचमा सहयोग र साझेदारी तीव्र गतिमा अघि बढेको छ, अबको नयाँ दशक नेपाल–भारत सम्बन्धको स्वर्णिम दशक हुनेछ ।’ 

भिडियो कन्फरेन्समा ओली–मोदी संवाद

•  प्रधानमन्त्री ओलीको निम्तो : तपाईंलाई नेपालमा स्वागत गर्न म प्रतीक्षारत छु । तपाईंको भ्रमणले हाम्रो दुई देशबीच भएका उपलब्धिको समीक्षा गर्ने र भविष्यका लागि नयाँ कार्ययोजना बनाउने अवसर दिनेछ ।
•  योजना बनाउँदै मोदी : नेपाल भ्रमणको निमन्त्रणाप्रति गर्व महसुस गरेको छु । तपाईं (ओली) र नेपाली जनताको स्नेहले मलाई तानेको छ । कार्यक्रम बनाइरहेको छु र निश्चय नै तपाईंको साथमा समय व्यतीत गर्नेछु ।