बन्दीपुर ‘फुड फेस्ट’ १७ माघदेखि
रेस्टुरेन्ट एन्ड बार एसोसिएसन नेपाल (रेबान) को आयोजनामा पर्यटकीय क्षेत्र तनहुँको बन्दीपुरमा ‘फुड फेस्ट’ आयोजना हुने भएको छ । भ्रमण वर्ष २०२० लाई सफल बनाउन १७ र १८ माघमा फुड फेस्ट आयोजना हुन लागेको रेबानको अध्यक्ष अरनिको राजभण्डारीले जानकारी दिए ।
बन्दीपुरमा तुलनात्मक रूपले आन्तरिक पर्यटकको भिड बढी हुने भएकाले सोहीअनुसार खानाका परिकार तयार हने रेबानले जनाएको छ । ‘बन्दीपुर पुग्ने प्रत्येक आन्तरिक तथा बाह्य पर्यटकका लागि विशेष खानेकुरा हुनेछन् ।
साथै बस्न र मनोरञ्जन गर्न विविध कार्यक्रम पनि राखिएका छन्,’ अध्यक्ष राजभण्डारीले भने । बन्दीपुरमा काठमाडौं, पोखरा, चितवनलगायतका रेस्टुरेन्ट व्यवसायीले स्टल राख्ने जनाइएको छ ।
त्यसैगरी, बन्दीपुरकै स्थानीय पर्यटन व्यवसायीको पनि उल्लेख्य सहभागिता रहने रेबानले जनाएको छ । कार्यक्रमलाई कार्यक्रमको मुख्य प्रायोजक गोर्खा ब्रुअरी र अन्य प्रायोजकमा जावलाखेल ग्रुप आफ कम्पनी, नेपाल डिस्टिलरी रहेका छन् । ‘खाना तथा बस्नका लागि यो महोत्सवमा छुटको व्यवस्थासमेत हुनेछ,’ उनले भने ।