ट्र्याक्टर दुर्घटनामा दुईको मृत्यु
सिरहाको गोलबजार नगरपालिका–७ मा शनिबार दिउँसो ट्र्याक्टर दुर्घटना हुँदा दुईजनाको मृत्यु भएको छ । दुर्घटनामा अरू पाँचजना घाइते भएका छन् ।
सिरहाको धनगढीमाई नगरपालिकाबाट कर्जन्हा नगरपालिकाका लागि जन्ती जाँदै गरेको स.१त ६५६० नम्बरको डिजे साउन्ड र जेनरेटर बोकेको ट्र्याक्टरको ट्रली पल्टिँदा लहान नगरपालिका–१३ का २२ वर्षीय सन्तोषकुमार यादव र धनगढीमाई–१२ का २० वर्षीय श्रीप्रसाद मण्डलको मृत्यु भएको दुर्घटना भएको इलाका प्रहरी कार्यालय गोलबजारका प्रहरी निरीक्षक जनक पुरीले जानकारी दिए ।
तीव्र गतिमा रहको ट्र्याक्टरले बाटो काट्दै गरेको बाख्रालाई जोगाउन खोज्दा दुर्घटना भएको हो । घाइते पाँचजनाको स्थानीय स्वास्थ्य संस्थामा उपचार भइरहेको छ । उनीहरूको अवस्था सामान्य रहेको प्रहरीले जनाएको छ ।