गुडविल फाइनान्सको साधारणसभाले गत आवको नाफाबाट लगानीकर्तालाई १० प्रतिशत नगद लाभांश दिने प्रस्ताव पारित गरेको छ । मंगलबार बसेको फाइनान्सको २५औँ वार्षिक साधारणसभाले कम्पनीका अध्यक्ष राजाराम जोशीले आर्थिक वर्ष ०७५/७६ को वार्षिक प्रतिवेदनसहित लाभांश प्रस्ताव पारित गरेको हो ।
संस्थाले निक्षेपतर्फ गत आवको तुलनामा २७ प्रतिशत वृद्धि गरी ६ अर्ब ८९ करोड ५६ लाख पुर्याएको छ । त्यस्तै कर्जातर्फ २६ प्रतिशतले वृद्धि गरी ५ अर्ब ९० करोड ३१ लाख पुर्याएको छ ।
सो अवसरमा संस्थाका प्रमुख कार्यकारी अधिकृत सरोजकाजी तुलाधरले २५ करोड रुपैयाँबराबरको डिबेन्चर निष्कासन गर्ने तयारीमा रहेको जानकारी दिए । उनका अनुसार ७ वर्ष अवधि रहेको डिबेन्चरमा १२ प्रतिशत ब्याजदरमा ६/६ महिनामा भुक्तानी हुनेछ । प्रतिडिबेन्चर १ हजारका दरले २ लाख ५० हजार ‘१२ प्रतिशत गुडविल फाइनान्स लिमिटेड डिबेन्चर २०८३’ निष्कासन गरिनेछ ।
साधारणसभाले आगामी ४ वर्षका लागि नयाँ सञ्चालक समितिको गठन गरेको छ । जसअन्तर्गत संस्थापक सेयरधनीहरूका तर्फबाट सुधीरमान मास्के, दिलीपकुमार मुनकर्मी, जेनी जोशी (महिला सञ्चालक) तथा सर्वसाधारण सेयरधनीका तर्फबाट विश्वप्रकाश साखः, पशुपतिभक्त श्रेष्ठ, रमेश मल्ल निर्विरोध निर्वाचित भएका छन् ।