काठमाडौं मैतीदेवीस्थित महाकवि लक्ष्मीप्रसाद देवकोटाको निवास अब संग्रहालयमा रूपान्तरित हुने भएको छ । ‘कविकुञ्ज’ नाम दिइएको स्वर्गीय देवकोटाको निवासमा संग्रहालय बनाउन नेपाल प्रज्ञा प्रतिष्ठानले उनको परिवारबाट घर र जमिन खरिद गरेको हो ।

हक हस्तान्तरणबापत सोमबार महाकवि देवकोटाका छोराहरू पद्मप्रसाद र दीपकलाई डिल्लीबजार चारखालअड्डास्थित मालपोत कार्यालयमा दुई करोड ५० लाख रुपैयाँको चेक हस्तान्तरण गरियो । प्रज्ञा प्रतिष्ठानका सदस्य–सचिव जगतप्रसाद उपाध्यायका अनुसार सरकारको निर्णयअनुसार १२ आना एक दाम क्षेत्रफलको जग्गाको हक हस्तान्तरण भएको हो ।

हालसम्म जग्गाप्राप्ति नहुँदा संग्रहालय निर्माण अगाडि बढेको थिएन । प्रतिष्ठानका कुलपति गंगाप्रसाद उप्रेतीका अनुसार उक्त स्थानमा चार तलाको संग्रहालय बनाउने योजना छ ।