पाकिस्तानका अविद अली टेस्ट तथा एकदिवसीय क्रिकेटको डेब्यु खेलमै शतकीय इनिङ खेल्ने विश्वकै पहिलो पुरुष ब्याट्सम्यान बनेका छन् । अविदले यो सफलता श्रीलंकाविरुद्धको पहिलो टेस्टमा प्राप्त गरेका हुन् ।
सन् १९७३ मा इंग्ल्यान्डका इनिद बाकेवलले महिलातर्फ टेस्ट तथा एकदिवसीयमा डेब्यु गर्दा शतक बनाएकी थिइन् । सन् २००९ पछि पाकिस्तानी भूमिमा सम्भव भएको टेस्ट खेलमा श्रीलंकाले पहिलो ब्याटिङ गर्दै ६ विकेटको नोक्सानीमा २५२ रन बनाएको थियो ।
पाकिस्तानले आइतबार पाँचौँ दिन दुई विकेटको नोक्सानीमा दुई सय ५२ रन जोड्यो । श्रीलंका र पाकिस्तानबीचको पहिलो टेस्ट ड्र भयो । टेस्टको सुरुवाती चार दिन खराब मौसमले प्रभावित पारेको थियो ।
अविदले २९८ बलमा ११ चौका प्रहार गरी १०९ रन बनाए । यसैगरी, बाबर अजामले १५० बलमा १०२ रन जोडे । गत मार्चमा अविदले अस्ट्रेलियाविरुद्धको एकदिवसीय डेब्युमा ११२ रनको योगदान दिएका थिए ।