महाकालीमा र्याफ्टिङ परीक्षण
कञ्चनपुरको महाकाली नदीमा पहिलोपटक र्याफ्टिङ सञ्चालन गरिएको छ । भीमदत्त नगरपालिकाले परीक्षणस्वरूप जिल्लाको उत्तरी चुरे फेदी क्षेत्रको महाकाली नदीमा साहसिक जलयात्रा अर्थात् र्याफ्टिङ परीक्षण गरेको हो ।
महाकाली नदीको बहुउपयोग गर्ने उद्देश्यले भीमदत्त नगरपालिका ९ मच्छेट्टीबाट सुरु भएको र्याफ्टिङ खल्लासम्म झन्डै ५ किलोमिटर दूरीको यात्रा गरिएको थियो । भीमदत्त नगरका मेयर सुरेन्द्र विष्टले र्याफ्टिङको सम्भावना अध्ययनका लागि परीक्षणस्वरूप तीन बोटिङ गरिएको बताए । उनका अनुुसार कर्णाली र्याफ्टिङ कम्पनीले महाकालीमा सफल परीक्षण गरेको छ ।
बोटिङकै माध्यमबाट नेपालमा जलाशयको उपयोगका साथै पर्यापर्यटन र सुरक्षाका लागि सदुपयोग गर्न सकिने मेयर विष्टको भनाइ छ । मेयर विष्टले महाकालीमा बोटिङ सम्भव भएकाले अध्ययन गर्दै यसलाई कानुनी रूपमै सञ्चालन गरिने बताए ।
बिहीबार गरिएको परीक्षण कार्यक्रम उद्योग मन्त्री एवं नेकपाका नेता कर्ण थापा, सुदूरपश्चिम प्रदेश सरकारका उद्योग, पर्यटन तथा वातावरण राज्यमन्त्री प्रकास रावल, भीमदत्त नगरका जनप्रतिनिधिलगायतको सहभागिता थियो ।