तस्बिर : अमुल थापा
२०७६ मङ्सिर १७ मंगलबार ०६:१८:००
प्रकाश कँडेल काठमाडाैं

दुई बच्चाकी आमा आयशाले पाइन् एकै दिन दुई स्वर्ण

१२औँ सागमा रजतमै सीमित भएकी आयशाले फेरि तेक्वान्दोमा स्वर्ण जितेर तहल्का मच्चाउँछिन् भन्ने कमैले सोचेका थिए, उनी आफैँलाई खेलमा फर्कन्छु भन्नेसम्म पनि लागेको थिएन । उमेर ढल्कँदै थियो, दुई सन्तानकी आमा बनेपछि पारिवारिक जिम्मेवारी बढेको थियो । तर, २००६ को कोलम्बो सागमा रजत र २०१० को ढाका सागमा स्वर्ण जितिसकेकी आयशाले यसपटक दोहोरो स्वर्ण जितेर इतिहास रचिन् ।

यसपटक उनले पुम्सेको महिला टिम इभेन्ट्स र एकल स्पर्धामा स्वर्ण जितेकी हुन् । सागमा एकै संस्करणमा दुई स्वर्ण जित्ने उनी पहिलो नेपाली महिला हुन् । त्यस्तै, सागमा महिलातर्फ सर्वाधिक दुई स्वर्ण जित्ने संगीना वैद्यको कीर्तिमान भंग गर्दै उनले आफ्नो स्वर्ण संख्या ३ पु-याइन् । ‘१२ औं सागपछि यसरी शशक्त पुनरागमन गर्छु भन्ने कल्पना थिएन,’ सोमबार दोहोरो स्वर्ण जितेपछि आयशाले भनिन्, ‘धेरैले सुझाव दिन्थ्यें । खेल्न छाडेर बच्चा हुर्काउन लाग । तर दीपकले सधैं हौस्याँइरहे ।’

उनका श्रीमान् दीपक विष्ट सागका किर्तिमानी खेलाडी हुन्, जसले लगातार चार संस्करणमा चार स्वर्ण जितेका छन् । विष्ट अहिले प्रशिक्षक छन् । आयशाका अनुसार दीपकले नै तेक्वान्दोमा ‘गेरुगी’ छाडेर ‘पुम्से’ विधा रोज्न लगाएका हुन् । ‘ यो मेरो एक्लो उपलब्धी होइन । मेरो सर्वाधिक ठूलो सफलताको सारथी नै दीपक हुन्,’ दोहोरो स्वर्ण जितेपछि यति भन्दै उनी रुन थालिन् । दुई छोरा आदिश र आधारलाई डोहो-याउँदै दीपक आयशालाई बधाई दिन आए, त्यसपछि दीपकको अंगालोमा बाँधिएपनि आयशाको आँशु रोकिएन । ‘मजस्ता धेरै आमाहरूलाई यसले सफलताका लागि हौसला र आँट मिलोस् । यो मेरो जीवनकै अद्भूत भोगाई हो,’ आँशु पुछ्दै उनले भनिन्,‘ रातदिन मेहिनत गरेको थिएँ । सपना पुरा हुँदा मलाई कहाँबाट कहाँ पुगेजस्तो महसुस भइरहेको छ ।’

गेरुगी र पुम्से यात्रा 
 ‘म होचो भएकाले फाइटमा विपक्षीले त्यसको फाइदा उठाएजस्तो लाग्छ । त्यसैले १२ औं सागमा रजतमै सीमित भएको महसुस हुन्छ,’ केही समयअघि पुम्से विधामा लाग्नुको कारण आयशाले नयाँ पत्रिकासँग खोलेकी थिइन् । यसअघि उनले सागमा जितेका पदक, गेरुगी विधाअन्तर्गत थिए । आयशाको यात्रा पुम्सेमा मोडिएको धेरै भएको छैन । गत वैशाखमा आठौं राष्ट्रिय खेलकुद सुरु हुनभन्दा केहीअघि उनले पुम्से अभ्यास गर्न थालिन् । ‘ प्रयास गरियो भने कुनै न कुनै बाटो फेलापर्छ र एकदिन सफल भन्छ भनेर प्रशिक्षणलाई निरन्तरता दिएँ ।

अहिले हर्षविभोर छु,’ उनले भनिन् । आयशाले आफ्नो सफलताको जस परिवार र प्रशिक्षकलाई दिन चाहिन् । ‘मेरा दुई स्वर्ण दुई छोरा र मेरो परिवारलाई,’ उनले थपिन्,‘ अनि मेरो यात्रामा सहयोग गर्ने आदरणीय गुरुहरू र तमाम शुभचिन्तकलाई ।’आमा बन्नु सफलताका लागि बन्देज होइन, उत्प्रेरणा बन्नसक्छ । उनले यही साबित गरेकी छिन् । ‘जीवनमा हार नमान्नुहोस् । लागिरहनुहोस्, सफलता कुनै दिन हात लाग्छ,’ नयाँ पत्रिकासँगको कुराकानी बिट मार्दै उनले भनिन् ।