चितवन महोत्सवको स्टल नम्बर ५ सय ५७ मा चितवन केरा उत्पादक संघले केराका परिकारहरू राखेको छ । पहिलो दिनबाट उक्त स्टलमा अवलोकनकर्ताको भिड लागेको छ । केराको परिकार खानेहरू तँछाड–मछाड गरिरहेका देखिन्छन् भने परिकार बनाउन १० कुकलाई भ्याइनभ्याई छ ।
‘केराका परिकार असाध्यै मन पर्छ, त्यसमा पनि केराको मःम निकै खान्छु,’ भरतपुर महानगरपालिका वडा नं. ६ बाट महोत्सव घुम्न आएका ज्ञानप्रसाद रिजालले भने, ‘शुद्ध शाकाहारीका लागि त झन् केराका परिकार निकै उपयोगी हुन्छ ।’
‘केरा खेतीको पहिचान, कृषिमा नयाँ अभियान’ भन्ने सोचसहित सुरु गरिएको यस अभियानले केराखेतीमा नयाँ सम्भावना उजागर गरेको छ । स्टलमा केराको मःम, पकौडा, चिप्स प्रतिप्लेट ८० रुपैयाँमा पाइने चितवन बनाना क्याफेका सञ्चालक लक्ष्मण सुवेदीले बताए ।
चितवन महोत्सवमा ०६६ देखि केराको परिकारको स्टल राखिँदै आएको छ । चितवन केराका लागि उपयुक्त भएकाले केरा उद्योगको सम्भावना पनि प्रचुर रहेको छ । महोत्सवले व्यावसायिक केरा खेतीका लागि विशेष भूमिका निर्वाह गरेको देखिन्छ ।