फुटबल मैदानमा सिट जडान
सहआयोजक सहर पोखरामा फुटबल मैदानको ग्यालरी सीअन्तर्गतको विशिष्ट श्रेणीसहितको प्यारापिटमा सिट जडान गरिएको छ । पोखरा रंगशाला फुटबल मैदानमा महिला फुटबल प्रतियोगिता हुने भएपछि मैदानको कामसमेत धमाधम भइरहेको छ ।
निर्माणाधीन फुटबल मैदानमा प्रतियोगिताका लागि तत्काल पूर्व र पश्चिम भागमा प्यारापिट जडान गरिनेछ । पोखरामा हुने खेलमध्ये महिला फुटबल मुख्य आकर्षणका रूपमा छ । मैदानका लागि दुबो भारतको कोलकाताबाट ल्याइएको छ ।
प्यारापिटका लागि स्टिल मोडुलर ग्रान्ड स्ट्यान्डका सामान फ्रान्सबाट ल्याइएको हो । प्यारापिट जडानका लागि फ्रान्सबाट दुईजना प्राविधिकसमेत पोखरा आएका छन् । पोखरा रंगशालामा नवनिर्मित प्यारापिटमा जडित सिट नेपालको झन्डासँग मिल्ने गरी राखिएको छ । पोखरामा महिला फुटबल १७ देखि २४ मंसिरसम्म हुनेछ । आयोजक नेपालसहित भारत, माल्दिभ्स र श्रीलंकाले महिला फुटबलमा सहभागिता जनाएका छन् ।