- वि.सं २०८१ बैशाख ७ शुक्रबार
पछिल्लो समय लोकगायिका विष्णु माझी निकै चर्चामा छिन् । उनको चर्चाको कारण भूमिगत जीवनशैली पनि हो । तर, त्यतिले मात्र चर्चा चुलिएको पक्कै होइन । लगातार लोकगीतमार्फत स्रोताको मन जितिरहेकी उनले पछिल्लोपटकको गीतबाट नयाँ रेकर्ड राखेकी छिन् ।
यतिवेला उनले कुलेन्द्र विकसँग गाएको ‘सालको पातको टपरी हुनी’ बोलको लोकगीत चर्चामा छ । युट्युबमा यो गीतको भिडियोले अहिलेसम्म सबैभन्दा बढीपटक हेरिएको लोकगीतको रेकर्ड राखिएको छ । यसअघि यो रेकर्ड ‘उही खोलीको पानी’ले कायम गरेको थियो ।
‘सालको पातको टपरी हुनी’ बोलको गीत दुई करोड सात लाखभन्दा बढीपटक हेरिसकिएको छ । ‘उही खोलीको पानी’ भने एक करोड १० लाखपटक हेरिएको छ । सालको पात गीत बजारमा आएको चार महिना मात्र भएको छ । यसमा नवराज पन्तको शब्द, वसन्त थापाको संगीत संयोजन छ ।
