सामुदायिक वन समन्वय समिति कञ्चनपुरले हात्तीपीडित परिवारलाई नगद राहत प्रदान गरेको छ ।
गत २९ असोजमा जंगली हात्तीको आक्रमणमा परि मृत्यु भएका शुक्लाफाँटा नगरपालिका १ बन्साहका बलदेब बोहराको परिवारलाई राहत स्वरुप २५ हजार रुपैयाँ सहयोग गरिएको हो ।
सामुदायिक वन समन्वय समितिका उपाध्यक्ष अर्जुन साउदले पीडित परिवारलाई नगद २५ हजार राहत सहयोग गरिएको बताए । उपाध्यक्ष साउदका अनुसार बन्यजन्तु राहत कोषबाट उक्त रकम सहयोग गरिएको हो । राहत हस्तान्तरण कार्यक्रममा प्रमुख अतिथि समेत रहेका सुदूरपश्चिम प्रदेशसभा सदस्य महेश दत्त जोशीले स्व. बोहराकी धर्मपत्नी मैनादेवी बोहरालाई नगद रकम हस्तान्तरण गरेका थिए ।
प्रदेशसभा सदस्य जोशीले मानव र वन्यजन्तुबीचको द्वन्द्व न्यूनीकरणका लागि राहतका साथै जंगली जनावरको आतंक रोक्नका लागि कार्यक्रम ल्याउन पहल गर्ने आवश्वासन दिए । सामुदायिक वन समन्वय समितिका अध्यक्ष शिवदत्त पन्तको अध्यक्षतामा राहत रकम सहयोग गरिएको थियो ।