च्यासलको फराकिलो जित

दिल्लीमाथि ६–० को जित निकाल्दा च्यासलका अर्मान्ड मोएनले ह्याट्रिक गरे

२०७५ पौष २७ शुक्रबार १०:३३:०० | धनगढी

विदेशी खेलाडी अर्मान्ड मोएनको ह्याट्रिकको सहयोगमा च्यासल क्लबले बिहीबार खप्तड गोल्डकप फुटबल प्रयितोगितामा दिल्ली फुटबल क्लबमाथि ६–० को फराकिलो जित दर्ता गरेको छ । जितसँगै च्यासल क्वार्टरफाइनलमा प्रवेश गरेको छ । अर्मान्ड पहिलो हाफमा १ तथा दोस्रो हाफमा २ गोल गर्दै डेब्यु प्रतियोगितामा ह्याट्रिक लगाउन सफल भएका हुन् । च्यासलले अब सेमिफाइनल प्रवेशका लागि थ्री स्टारको सामना गर्नेछ । प्रतियोगिताअन्तर्गत शुक्रबार रुपन्देहीको गोर्खा ब्वाइजले संकटा क्लबको सामना गर्नेछ । 

पहिलो हाफमा ३ गोल
 च्यासलले पहिलो हाफमा ३–० को अग्रता लिँदै दिल्लीका खेलाडी खेलमा फर्कन सकेनन् । खेलको १४औँ मिनेटमा सन्जोग राईले च्यासललाई १–० को अग्रता दिलाए । खेलको ३१औँ मिनेटमा हेमन्त थापामगरले गोल गर्दै च्यासललाई २–० को स्थितिमा राखे । अर्मान्डले ४०औँ मिनेटमा व्यक्तिगत पहिलो गोल थप्दा च्यासल ३–० ले अघि रह्यो । 
दोस्रो हाफमा ह्याट्रिक
च्यासलले दोस्रो हाफको सुरुवातदेखि नै दिल्लीको पोस्टमा चार्ज ग-यो । च्यासलका लागि ४९औँ मिनेटमा अर्मान्डले व्यक्तिगत दोस्रो गोल गरे । खेलको ७३औँ मिनेटमा योगेश गुरुङको पासमा अर्मान्डले ह्याट्रिक पूरा गरे । खेलको अन्तिम इन्जुरी समयमा सन्तबहादुर गुरुङले च्यासललाई ६–० को जित दिलाए । प्रतिस्पर्धामा दिल्लीका नियमित ६ खेलाडी अनुपस्थित रहे । आफ्ना मुख्य खेलाडी उपलब्ध नहुँदा नै च्यासलसँग फराकिलो अन्तरले पराजित भएको दिल्लीका प्रशिक्षक विएस मेहेराले बताए । ‘मेरा मुख्य ६ खेलाडी आउन सकेनन्,’ उनले भने ।

 

 

प्रतिकृया दिनुहोस