आगामी फागुनमा प्रदान गरिने ५१ हजार राशिको ‘दधिराज सुवेदी राष्ट्रिय भाषा साहित्य पुरस्कार २०७६’ कवि डा. विष्णुविभु घिमिरे र २५ हजार राशिको ‘दधिराज सुवेदी राष्ट्रिय पत्रकारिता पुरस्कार ०७६’ पत्रकार मोहन भण्डारीलाई प्रदान गर्ने निर्णय गरिएको छ ।
कवि घिमिरेले चार दशकदेखि नेपाल साहित्यमा योगदान पुर्याएको र पत्रकार भण्डारीले नेपाली पत्रकारितमा तीन दशकदेखि पुर्याएको योगदानको कदर गर्दै उक्त पुरस्कार प्रदान गर्ने निर्णय गरिएको दधिराज सुवेदी पुरस्कार प्रतिष्ठान विराटनगरले जनाएको छ ।
साहित्यकार घिमिरेका कठघरामा उभिएर (कविता ), काँडाकाँडामा टेकेर (कविता), सडक नाटकका पाँच वर्ष (समीक्षा)संग्रहलगायत प्रकाशित छन् । उनी सुरुचि, गरिमा, विमोचनजस्ता पत्रिकाका सम्पादकसमेत भइसकेका छन् । पत्रकार भण्डारी विराटनगरबाट प्रकाशित हुने उद्घोष दैनिकका प्रधानसम्पादक हुन् ।
यसअघि यो पुरस्कार साहित्यकार, प्रा.डा. गोविन्दराज भट्टराई, प्रा.डा. अभि सुवेदी, प्रा.डा. माधवप्रसाद पोखरेल र पत्रकारत्रय हरिबहादुर थापा, शिवबहादुर कार्की र किशोर नेपाललाई प्रदान गरिएको थियो । समालोचक प्राज्ञ सुवेदीका छोराद्वय शरदराज सुवेदी र रूपकराज सुवेदीले राखेको १५ लाख अक्षय कोषको ब्याजबाट प्रत्येक वर्ष यो पुरस्कार प्रदान गरिन्छ । प्रतिष्ठानका अध्यक्ष प्राज्ञ विवश पोखरेलको अध्यक्षतामा बसेको कार्यसमितिको बैठकले सो निर्णय गरेको हो ।