यस वर्षको घरेलु फ्रेन्चाइज टी–२० क्रिकेट सिजन आगामी कात्तिकदेखि चैतसम्म रहने भएको छ । नेपालमा आयोजना हुने प्रतिष्ठित सबै फ्रेन्चाइज क्रिकेट प्रतियोगिताले आफ्नो आगामी संस्करणको आयोजना मिति कात्तिकदेखि चैतभित्रै निर्धारण गरेका छन् ।
पोखरामा हुने पोखरा प्रिमियर लिग (पिपिएल)ले आफ्नो आगामी संस्करण २६ कात्तिकदेखि ७ मंसिरसम्म आयोजना गर्ने घोषणा गरिसकेको छ । पिपिएलको यो दोस्रो संस्करण हो । यस्तै, काठमाडौंमा हुने एभरेस्ट प्रिमियर लिग (इपिएल)ले आफ्नो तेस्रो संस्करणको आयोजना मिति ७ फागुनदेखि १ चैतलाई तोकेको छ ।
घरमा आयोजना हुने अर्काे प्रतिष्ठित फ्रेन्चाइज क्रिकेट प्रतियोगिता धनगढी प्रिमियर लिग (डिपिएल)ले पनि आफ्नो चौथो संस्करण फागुनमै आयोजना गर्ने घोषणा गरेको छ । आयोजक धनगढी क्रिकेट एकेडेमीले बिहीबार डिपिएलको आगामी संस्करणको मिति ३ देखि १५ फागुनलाई तोकेको हो । आयोजकले यस वर्ष पनि डिपिएल प्रस्तावित फाप्ला क्रिकेट मैदानमै गराइने जनाएको छ ।
डिपिएलमा ६ सहरका ६ टोली
डिपिएलमा विभिन्न ६ सहरका ६ टोलीले सहभागिता जनाउँदै आएका छन् । चौथो संस्करणको प्रतियोगितामा पनि सहभागी टोली उही नै हुनेछन् । प्रतियोगितामा विराटनगर किंग्स, सिवाइसी अत्तरिया, काठमाडौं गोल्डेन्स, महेन्द्रनगर युनाइटेड, रुपन्देही च्यालेन्जर्स र धनगढी स्टार्स सहभागी छन् । डिपिएलमा धनगढी सर्वाधिक सफल टोली हो । धनगढीले यसअघि आयोजना भएका तीनमध्ये सुरुवाती दुई संस्करणको उपाधि जितेको थियो । अत्तरिया प्रतियोगिताको साबिक विजेता टोली हो ।