- वि.सं २०८१ बैशाख १३ बिहीबार
बलिउडमा ‘बिग बी’ भनेर चिनिने अमिताभ बच्चनलाई भारतीय सिनेमामा योगदान पुर्याएकोमा मंगलबार दादा साहब फाल्के पुरस्कारले सम्मानित गरिएको छ। उनले पुरस्कार पाएसँगै उनका समर्थक र सँगै काम गरेका कलाकारले बधाई दिएका छन् । प्रख्यात स्वर सम्राज्ञी लता मंगेशकर र अर्का सुपरस्टार रजनीकांतले बधाई दिँदै उनको प्रशंसा गरेका छन् ।
स्वर सम्राज्ञी लता मंगेशकरले फिल्म क्षेत्रमा ५० वर्ष बिताएका बच्चनलाई पुरस्कार दिने निर्णय ढिलै भए पनि सुखद रहेको बताएकी छिन् ।
मंगेशकरले बधाई ज्ञापन गर्दै बच्चन धेरै अघि यो पुरस्कारको हकदार रहेको बताइन् । ‘उनलाई यो प्रतिष्ठित पुरस्कार पहिले नै दिएको भए राम्रो हुन्थ्यो,’ उनले भनिन्, ‘सरकारको यो फैसलाबाट म धेरै खुशी छु ।’
अमिताभ बच्चनलाई फिल्म क्षेत्रको पिलर भन्दै उनले प्रशंसा गरेकी छिन् । काम गर्दा बच्चनमा देखिने उर्जा प्रेरणादायी हुने गरेको उनको अनुभव छ । काम गर्दा जहिले पनि उत्साहित हुने धेरै कम देखेको मंगेशकरले बताएकी छिन् । ‘उनको काम गर्ने शैली कमालको छ,’ उनले भनिन्, ‘उनी महान कलाकार हुन् । ’
अमिताभसँगै धेरै फिल्म खेलेका रजनीकांतले ट्विटरमा दिग्गज अभिनेतालाई शुभकामना दिँदै भनेका छन्, ‘बधाई छ प्रिय बच्चनजी, तपाई यस प्रशंसनीय सम्मान को योग्य हुनुहुन्छ।’
