सर्वोच्च अदालतले छाड्न आदेश दिएका विप्लव नेतृत्वको नेकपाका तीन नेतालाई बिना पक्राउ पुर्जी प्रहरी गिरफ्तार गरेको छ । गिरफ्तार हुनेमा जंगबहादुर गुरुङ, काजी गुरुङ र विद्यार्थी नेता मिलन राई रहेका छन् । उनीहरूलाई सर्वाेच्च अदालतको आदेश विपरीत पुन: अदालतकै गेटबाट पक्राऊ गरेको हो ।
सर्वोच्चका न्यायाधीशद्वय विश्वम्भरप्रसाद श्रेष्ठ र टंकबहादुर मोक्तानको संयुक्त इजलासले उनीहरूलाई छाड्न आदेश दिएको थियाे । गत २५ जेठदेखि उनीहरूलाई प्रहरीले विभिन्न जिल्ला घुमाउँदै म्याद थप गर्दै आएको थियो । तीनै जनालाई कास्की, तनहुँ, लमजुङ, गोरखा हुँदै पुन: लमजुङमै पुर्याएर गत १७ भदौमा पहिलो पटक र २६ भदौमा दोस्रो पटक म्याद थप गरिएको थियो ।
यसअघि सर्वोच्चले बारम्बार कसैलाई पनि राजनीति आस्थाका आधारमा पक्राउ गर्नु गैरकानुनी कार्य भएको भन्दै सरकारलाई पक्राउ नगर्न निर्देशन दिएको छ ।