सरकारले प्रतिवन्ध लगाएकाे नेपाल कम्युनिस्ट पार्टीका महासचिव नेत्रविक्रम चन्द 'विप्लव' का छोरा प्रकाश चन्दलाई बुधबार चितवनबाट प्रहरीले पक्राउ गरेकाे छ ।
चिकित्सा शिक्षा ऐन कार्यान्वयनको माग गर्दै भरतपुरस्थित चितवन मेडिकल कलेजमा आन्दोलको अगुवाइ गरेका प्रकाश चन्दसहित अन्य १५ विद्यार्थीलाई पक्राउ गरेकाे जिल्ला प्रहरी कार्यालय चितवनका प्रवक्ता एकनारायण कोइरालाले बताए । सो क्रममा प्रहरीले आन्दाेलनकाे भिडियो खिच्ने दुई जनालाई पनि पक्राउ गरेको छ ।
अस्पतालको सेवा प्रवाहमा अवरोध खडा गर्न खोजेपछि उनीहरुलाई पक्राउ गरिएकाे प्रहरीकाे भनाई छ । उनीहरुलाई जिल्ला प्रहरी कार्यालय चितवनको सोधपुछ कक्षमा राखिएको छ ।