विनाअन्तःशुल्कका वस्तु बिक्री गरी एक गुट्खा उद्योगले साढे सात करोड कर छली गरेको छ । राजस्व अनुसन्धान विभागले कर छली गर्ने बाँकेको नेपालगन्ज उपमहानगरपालिका–१ स्थित नेपाल पान मसला उद्योगका प्रोपाइटर कुतबुद्दिन सेखविरुद्ध सात करोड ५२ लाख रुपैयाँ बिगो दाबी गर्दै बाँके जिल्ला अदालतमा मुद्दा दायर गरेको छ । 

उत्पादित गुट्खामा स्टिकर नलगाई बिक्री गरेर उद्योगले अन्तःशुल्कसहित मूल्य अभिवृद्धि कर (भ्याट) र आयकरसमेत छली गरेको सोमबार विभागले दायर गरेको मुद्दामा उल्लेख छ । उद्योग विभागले दिएको अनुमतिभन्दा बढी परिमाणमा कच्चा पदार्थ तथा प्याकेजिङ सामग्रीको खपत गरी धेरै गुट्खा उत्पादन गरेकोसमेत विभागले जनाएको छ ।

यसलाई मिलाउन सञ्चालक सेखले त्रुटिपूर्ण तरिकाले उद्योगको हिसाबकिताब र लेखा प्रणालीको व्यवस्थापन गरेका थिए । यस्तो काम राजस्व चुहावट (अनुसन्धान तथा नियन्त्रण) ऐन, २०५२ प्रतिकूल भएको विभागको भनाइ छ । 

उद्योगले आर्थिक वर्ष ०७३/७४ देखि ०७५/७६ सम्मको खरिद, बिक्री तथा उत्पादन खाता, अन्तःशुल्क स्टिकर, बैंक स्टेटमेन्ट, विद्युत् खपतको विवरण र उद्योग विभागबाट कच्चा पदार्थ तथा प्याकेजिङ सामग्री खपतको प्रयोग अनुपात आदिको अनुसन्धान गरी विभागले छानबिन गरेको थियो ।

तीन आर्थिक वर्षमा गरेर उद्योगले ६ करोड ६ लाख अन्तःशुल्क छली गरेको विभागले जनाएको छ । सोही अवधिमा उद्योगले ८८ लाख ५३ हजार भ्याट र ६० लाख ४७ हजार आयकर छली गरेको विभागले अदालतमा दायर गरेको अभियोगपत्रमा उल्लेख छ । 

करिब ६ महिनाअघि विभागले बुटवलबाट विनास्टिकरका १० बोरा गट्खा बरामद गरेको थियो । त्यसैका आधारमा कर छलीको आशंकामा अनुसन्धान अघि बढाएको विभागका महानिर्देशक दीर्घराज मैनालीले बताए । प्रतिवादीसँगको बयान, कारोबार, चुहावट भएको राजस्व, बरामद भएको स्टिकर नलगाएको गुट्खा आदिको छानबिन भएको थियो ।