- वि.सं २०८१ बैशाख ११ मंगलबार
मेरो आइडल मिथिला शर्मा हुनुहुन्छ । अभिनयमा लाग्नुअघि नै मैले उहाँका प्रायः फिल्म हेरेकी थिएँ । बच्चैदेखि उहाँको अभिनय र नृत्यबाट प्रभावित भएँ । पछि पद्मकन्या कलेजमा नृत्य विषय लिएर पढेँ । सायद त्यसमा पनि उहाँको नृत्यको प्रभाव थियो ।
अभिनयमा लागेपछि ‘मुग्लान’, ‘सुख दुःख’लगायत थुप्रै फिल्ममा मिथिला दिदीसँग काम गर्ने अवसर पाएँ । उहाँबाट धेरै कुरा सिक्न र बुझ्न पाएँ । मैले करिअर सुरु गर्दा सिक्नका लागि अहिलेजस्तो सहज माध्यम थिएनन् । उहाँबाटै धेरै ज्ञान लिएँ । अहिले पनि उहाँसँग सिकिरहन्छु ।
वर्षौंदेखि उहाँ यो क्षेत्रमा निरन्तर सक्रिय र समर्पित हुनुहुन्छ । उहाँले अभिनय गरेका फिल्म सकभर नछुटाई हेर्छु । उहाँको फेसियल एक्सप्रेसन, संवाद र चरित्रप्रतिको न्यायबाट निकै प्रभावित छु ।
