शिक्षकको कुटपिटबाट विद्यार्थी घाइते
सल्यानको बागचौर नगरपालिका–२ थारमारेस्थित जनकल्याण नमुना माध्यमिक विद्यालयका शिक्षकले कुटपिट गरेर एक विद्यार्थी घाइते भएका छन् । दुईजना शिक्षकले कुटपिट गरेपछि कक्षा १० मा अध्ययनरत विशाल बस्नेत घाइते भएका हुन् । बुधबार दिउँसो विद्यालय प्रांगणमा अर्का विद्यार्थीसँग सामान्य भनाभन भइरहेकावबेला सहायक प्रधानाध्यापक तुलसीराम बस्नेत र यामबहादुर घर्तीले कुटपिट गरेको विशालले बताए ।
‘शिक्षकको कुटाइबाट घाइते भएको छ । अहिले श्रीनगरस्थित कान्तिपुर सामुदायिक अस्पतालमा उपचार भइरहेको छ,’ उनका बुबा तेजबहादुर बस्नेतले भने । विशालको टाउको, छाती र पेटमा चोट लागेको उनले बताए । विद्यालयका प्रधानाध्यापक पूर्ण भण्डारीले शिक्षकले कुटपिट नगरेको बताए । दुई विद्यार्थीबीच भएको झगडा छुट्याउँदा सामान्य चोटपटक लागेको उनको भनाइ छ ।