महोत्तरीमा बाढीसँगै छाला, श्वासप्रश्वाससम्बन्धी रोग र टाइफाइडका बिरामी बढेका छन् । मटिहानी नगरपालिका र मनारा–सिस्वा नगरपालिकामा आयोजित स्वास्थ्य शिविरमा चेकजाँच गराएका अधिकांशमा यस्तो समस्या देखिएको जनस्वास्थ्य निरीक्षक तथा महामारी स्रोतव्यक्ति सन्तोषकुमार ठाकुरले बताए ।
मटिहानीमा तीन सय ८७ र मनरा–सिस्वा नगरपालिकामा दुई सय दुई प्रभावितले स्वास्थ्य उपचार गराएका छन् । महामारी स्रोतव्यक्ति ठाकुरका अनुसार बुधबारदेखि रामगोपालपुर नगरपालिका, लोहारपट्टी नगरपालिका र महोत्तरी गाउँपालिकामा एकदिने स्वास्थ्य शिविर सञ्चालन गर्ने कार्यक्रम छ । ‘अहिलेसम्म मटिहानी र मनरा–सिस्वामा शिविर आयोजना गरेका छौँ, क्रमशः अन्य स्थानीय तहमा पनि आयोजना हुनेछ,’ उनले भने ।