काठमाडौं महानगरपालिकाका मेयर विद्यासुन्दर शाक्यले महानगर क्षेत्रभित्रका सम्पदा पुननिर्माण र संरक्षण गर्न पैसाको कमी नभएको बताएका छन् । शनिबार बिहान महानगरको वडा १५ विष्णुमती नदी किनारामा रहेको लखतीर्थ पुननिर्माणको शिलान्यास गर्दै शाक्यले सम्पदा पुनर्निर्माणका विषयमा महानगरलाई अहसयोग भएको गुनासोसमेत गरे ।
उनले लखतीर्थ पुनर्निर्माणकाका लागि ५० लाख रुपैयाँ खर्च गरेर काम गर्ने योजना रहेको बताए । पुनर्निर्माणको विस्तृत परियोजना प्रतिवेदन तयार पार्दा लागत बढेमा थप खर्च गर्न महानगर तयार रहेको उनले बताए । लखतीर्थ शंखधर साँख्वासँग सम्बन्धित स्थान हो । यहीँबाट उठाएको बालुवामा सुन भेटेपछि बेचेर शंखधरले किसानको ऋण तिरिदिएको जनविश्वास छ ।
पुननिर्माण जनसहभागितामा आधारित हुने महानगरले जनाएको छ । पुननिर्माणको गुरुयोजना तयार पार्ने, विस्तृत परियोजना प्रतिवेदन तयार पार्ने र परियोजना व्यवस्थापन गर्ने काम पुनर्निर्माण समितिले गर्नेछ ।