वसन्तको आरम्भसँगै पलाउन थालेका थरीथरीका फूलहरू यतिवेला भने राराको आँगनमा ढकमक्क फूलेका छन् । चारैतिर प्राकृतिक रूपमै फूलेका थरीथरी फूलले सुन्दर बगैँचाको झल्को दिएको छ । समथर पाटनमा रंगीबिरंगी फूलहरूले कञ्चन रारालाई पनि ओझेल पारेको भान हुन्छ ।
रारावरिपरि झन्डै एक सय प्रजातिका फूल फुल्छन् । यो फूलैफूलको मौसम भदौ अन्तिम सातासम्म रहन्छ । सुन्दरतासँगै रंगीबिरंगी फूलको सुगन्धले आगन्तकुलाई झन् लोभ्याउने गरेको छ । यस याममा रारा टेक्नेबितिक्कै चिसो सिरेटोसँगै फूलको सुगन्धसँग पनि लट्ठिन पुग्छन्, आगन्तुक ।