आठ महिनापछि विद्युत् सञ्चालन
त्रिपुरासुन्दरी नगरपालिका–६ स्थित खातीखोला लघु जलविद्युत् आयोजना आठ महिनापछि सञ्चालनमा आएको छ । नेपाल जलवायु परिवर्तन सहयोग कार्यक्रमको सहयोगमा नहर मर्मत गरिएपछि जलविद्युत् आयोजना सञ्चलानमा आएको हो । यसमा कार्यक्रमको १८ लाख र त्रिपुरासुन्दरी नगरपालिकाको पाँच लाख खर्च भएको जनाइएको छ । पहिरोले विभिन्न ठाउँमा क्षति पु-याएपछि आयोजना बन्द भएको थियो ।
विद्युत् आपूर्ति सुरु भएसँगै खदाङ, फुल्चिङ, ल्हाँ, पालङलगायत गाउँका बासिन्दालाई सहज भएको छ । यसबाट त्रिपुरासुन्दरी नगरपालिका वडा नं. ५ र ६ का सात सय ३२ परिवार लाभान्वित भएका छन् । यो आयोजना ०६६ मा निर्माण सुरु भएको थियो ।
८० किलोवाट क्षमताको आयोजनाबाट ०७४ देखि बत्ती बाल्न थालिएको थियो । उक्त अयोजना चार करोडमा निर्माण गरिएको थियो । त्रिपुरासुन्दरी–६ का वडाध्यक्ष धर्मजित बोहराले नेपाल जलवायु परिवर्तन सहयोग कार्यक्रमले जलवायु परिवर्तनको असरलाई ध्यानमा राख्दै नहर पुनर्निर्माण तथा मर्मत गरेकाले आयोजना सञ्चालनमा आएको बताए ।