सरकारले चीनसँगको हवाई सम्झौता पुनरावलोकन गर्न स्वीकृति दिएको छ । मन्त्रिपरिषद् बैठकले उडान संख्या वृद्धि, रुट तालिका पुनरावलोकनलगायत विषयमा वार्ता र सम्झौता गर्न टोली गठन गर्ने निर्णय गरेको हो ।
संस्कृति, पर्यटन तथा नागरिक उड्डयन मन्त्रालयका सहसचिवको नेतृत्वमा ५ सदस्यीय वार्ता टोली गठन गर्ने सरकारको निर्णय छ । आगामी २५ र २६ जुलाईमा चीनको राजधानी बेइजिङमा यससम्बन्धी वार्ता हुँदै छ ।
त्यस्तै, सर्लाही घटनाका मृतक सरोजनारायण सिंहको परिवारलाई १० लाख रुपैयाँ दिने र आन्दोलनका घाइतेको उपचार खर्च व्यहोर्ने निर्णय गरेको छ । विद्युतीय बस खरिद गर्न स्वीकृति दिने निर्णय पनि गरेको छ ।
सर्वोच्च अदालतको आदेशअनुसार ऐतिहासिक बागदरबारको संरक्षणका लागि दरबारको वास्तुकला, प्रविधि, वास्तुकृति र स्वरूपको मौलिकतालाई कायम राखी पुनर्निर्माण, पुनस्र्थापनाको विषयमा अध्ययन गरी तीन महिनाभित्र प्रतिवेदन पेस गर्न पुरातत्व विभागका महानिर्देशकको संयोजकत्वमा ११ सदस्यीय विज्ञसमूह गठन गर्ने निर्णय गरेको छ ।