सर्लाहीमा प्रहरी गोलीबाट मारिएका सिंहको परिवारलाई सरकारले १० लाख क्षतिपूर्ति दिने
बाटो खुलाउने क्रममा गत असार १५ गते प्रहरीले चलाएको गोली लागेर मृत्यु भएका सर्लाहीका सरोजनारायण सिंहको परिवारलाई सरकारले १० लाख आर्थिक सहायता उपलब्ध गराउने निर्णय गरेको छ ।
प्रहरीले अनावश्यक बल प्रयोग गर्दा सिंहको मृत्यु भएको भन्दै राष्ट्रिय जनता पार्टीले संसद आवाज उठाएको थियो । सो घटनाबारे संसदीय छानविन समिति बनाउनु पर्ने माग गर्दै राजपा र प्रमुख प्रतिपक्षले संसद अवरुद्ध गरेका थिए । गत असार १५ गते सर्लाहीको बाँकेमा प्रहरीको गोली लागेर सिंहको मृत्यु भएको थियो ।
सरकारका प्रवक्ता एवम् संचार तथा सूचना प्रविधिमन्त्री गोकुल बास्कोटाले सिंहको परिवारलाई राहत स्वरुप १० लाख आर्थिक सहायता उपलब्ध गराउने निर्णय गरिएको जानकारी दिए । मन्त्रीपरिषदको निर्णय सार्वजनिक गर्न आयोजित पत्रकार सम्मेलनमा बोल्दै उनले सो घटनामा घाइते भएकाहरुको उपचारको व्यवस्था पनि सरकारले गर्ने बताए ।
सोही घटनामा अर्का एक जनालाई गोली लागेको छ । अन्य केही घाइते छन् ।