प्रधानन्यायाधीश राणाले गरे पदभार ग्रहण, न्यायाधीश जोशीलाई राजीनामा दिन आग्रह

प्रधानन्यायाधीश चोलेन्द्र शमसेर राणाले सर्वोच्च अदालत पुगेर पदभार ग्रहण गरेका छन्। बुधबार बिहान शितल निवासमा राष्ट्रपति विद्यादेवी भण्डारीबाट सपथ ग्रहण गरेलगत्तै सर्वोच्च आएर कार्यभार सम्हालेका हुन् ।

पदभार ग्रहण गर्दै न्यायाधीश दीपकराज जोशीलाई अब पेशी नतोक्ने प्रधानन्यायाधीश चोलेन्द्र जबराले बताए । उनले दीपकराज जोशीलाई राजीनामा दिएर बाटो खुलाउन सुझाव दिँदै सर्वोच्चलाई बन्धक नबनाउन आग्रह गरे । सर्वोच्च अदालत परिसरमा न्यायाधीश र कर्मचारीहरुले प्रधानन्यायाधीश राणालाई स्वागत गरेका थिए । 

राणा प्रधानन्यायाधीशका निर्विकल्प दाबेदार थिए । राणा न्यायाधीश भएको १८ वर्षपछि सर्वोच्चमा न्यायाधीश बनेका हुन् । ३० चैत ०५२ मा पुनरावेदन अदालत विराटनगरमा अस्थायी न्यायाधीश सिफारिस भएका उनले ०७१ मा सर्वोच्चमा प्रवेश पाएका थिए । 

संवैधानिक परिषद्ले प्रधानन्यायाधीशका लागि राणासँगै दीपकराज जोशीको नाम पनि सिफारिस गरेको थियो । तर, यसअघि नै संसदीय समितिबाट अस्वीकृत भएका जोशीको नाममा यसपटक सुनुवाइ समितिमा छलफलसमेत भएन । 

तस्बिर : अमुल थापा/ नयाँ पत्रिका