काठमाडौंस्थित कमल पोखरीको पुनर्निर्माणको काम सुरु गरिएको छ ।
बिहीबार कमलपोखरीमा आयोजना गरिएको एक कार्यक्रममा काठमाडौं महानगरपालिकाका मेयर विद्यासुन्दर शाक्यले पोखरीको पुनर्निर्माणको कामको शिलान्याश गरेका हुन् ।
कार्यक्रममा मेयर शाक्यले कमल पोखरीलाई ऐतिहासिक रुपमा पुनर्निर्माण गरेर पर्यटनसँग जोड्ने घोषणा गरे । कमल पोखरी पुनर्निर्माणको काम एक वर्ष भित्र सम्पन्न गर्न निर्माण कम्पनीलाई सचेत गराउँदै उनले महानगरपालिका सबै खालको सहयोग उपलब्ध गराउन तयार रहेको बताए ।
कार्यक्रममा कांग्रेस नेता एवम् पूर्वमन्त्री गगनकुमार थापाले कमल पोखरीको पुनर्निर्माणको कामलाई समयमै सम्पन्न गर्न आवश्यक सक्रियता बढाउन स्थानीयलाई आग्रह गरे । उनले निर्माण कम्पनीलाई पनि समयमै पोखरीको पुनर्निर्माण नगरे कार्वाही गर्ने चेतावनी दिए । पोखरी निर्माणको लागि निर्माण कम्पनीलाई सबैले सहयोग गर्ने उनले बताए ।
काठमाडौं महानगरपालिका र स्थानीयको सहकार्यमा निर्माण गर्न लागिएको उक्त पोखरी एक वर्ष भित्र सम्पन्न गर्ने लक्ष्य राखिएको छ ।