३३ केजी सुनसहित कलकत्ताबाट दुई नेपाली पक्राउ
भारतको कलकत्ताबाट ३३ केजी सुनसहित दुईजना नेपाली पक्राउ परेका छन् । गत २१ गते शुक्रबार कलकत्ता प्रहरीले विशेष सुराकीको आधारमा एउटा कारमा खानतलासी गर्दा उक्त सुन भेटाएको हो ।
पक्राउ पर्नेमा नेपाली नागरिक राकेश प्रसाद र हेमप्रसाद शर्मा रहेको स्रोतले बताएको छ । उक्त सुन त्रिभुवन विमानस्थलबाट हराएको चर्चित ३३ केजी सुन भएको प्रहरीकाे दावी छ ।
त्रिभुवन अन्तर्राष्ट्रिय विमानस्थलबाट अवैध रुपमा भित्रिएको ३३ किलो सुन प्रकरणको छानविन गरिरहेको समितिले समेत कलकत्तामा सुन र दुई नेपाली पक्राउ परेको सुचना पाएपछि अनुसन्धान सुरु गरेको छ ।
मोरङ उर्लाबारीका गोरे भनिने चुडामणी उप्रेतीको समुहले पटकपटक अवैध सुन भित्र्याएको समितिको अनुसन्धानबाट खुलेको थियो । सनम शाक्यको हत्या भएपछि ६ बहालवाला प्रहरी अधिकृतसहित ६३ जनाविरुद्ध अभियोग दर्ता भएको थियो ।