सहिद स्मारक ए डिभिजन लिग च्याम्पियन मनाङ मर्स्याङदी क्लब एएफसी कपको समूह चरणबाटै बाहिरिएको छ । बुधबार बंगलादेशी क्लब अवहानी लिमिटेडसँग ५–० ले पराजित भएपछि मनाङ प्रतियोगिताबाट एक खेलअगावै बाहिरिएको हो ।
पहिलो हाफमा दुई गोल
मनाङ ढाकाविरुद्ध पहिलो हाफमै दुई गोलले पछि पर्यो । ढाका ११औँ मिनेटमै मनाङविरुद्ध अग्रता बनाउन सफल भयो । घरेलु टोलीका लागि मोहम्मद नविव निवाजले १–० का लागि गोल गरे । पहिलो हाफको इन्जुरी समयमा ढाका २–० ले अघि बढ्यो ।
मध्यान्तरपछि कमजोर
मनाङ दोस्रो हाफमा थप निरीह देखियो । ढाकाले निरन्तर गोल सम्भव बनायो । ६३औँ मिनेटमा जेवेल रानाले सोहेल रानाको पासको सदुपयोग गर्दै ढाकालाई ३–० को अवस्थामा पुर्याए । ७५औँ मिनेटमा सन्डे चिजोबा एनवाडिलोले गोल गर्दा मनाङ खेलमा फराकिलो गोलअन्तर भोग्न बाध्य भयो । खेलको अन्तिम इन्जुरी समयको पाँचौँ मिनेटमा मामुनल इस्लामले मनाङको पोस्टमा ५–० का लागि गोल गरे । इस्लामको गोलसँगै प्रतियोगितामा मनाङ सर्वाधिक फराकिलो अन्तरले पराजित भयो ।
जितविहीन मनाङ
प्रतियोगितामा मनाङ अन्तिम खेल बाँकी रहँदासम्म जितविहीन छ । पाँचमध्ये दुई खेलमा बराबरी खेलेको मनाङले तीन खेलमा हारको सामना गरेको छ । दुई अंकसहित मनाङ लिगको पुछारमा छ ।
अवहानी शीर्ष स्थानमा
समूह चरणमा शीर्ष स्थानमा रहने क्लबले अघिल्लो चरणमा स्थान बनाउनेछ । मनाङलाई पराजित गरेसँगै ढाका अवहानी शीर्ष स्थानमा उक्लिएको छ । मंगलबार नै भएको खेलमा भारतका दुई क्लब चेन्नई र मिनर्वा पन्जाबले १–१ गोलको बराबरी खेल्दै अंक बाँडे । यो नतिजासँगै बंगलादेशी क्लबलाई फाइदा भएको छ । आठ अंकसहित दोस्रो स्थानमा रहेको चेन्नईलाई अघिल्लो चरणमा पुग्न अन्तिम खेलमा मनाङलाई पराजित गर्नुपर्नेछ । ढाका पन्जाबसँग हार्नुपर्नेछ । समूह ‘ई’मा अवहानीको १० अंक छ भने चेन्नईको आठ र मिनर्वाको पाँच अंक छ । समूहबाट शीर्ष टोली अघिल्लो चरणमा पुग्नेछ ।
मनाङले खेलेका पाँच खेल