कष्टकर बन्दै विपतपीडितको जीवन

काभ्रे बेथानचोक गाउँपालिका– ३ पानटेखोलाका फणिन्द्रप्रसाद तिमल्सिनाले गत असोज दोस्रो साता घर बगाएपछि छिमेकीको शरणमा बसेको अढाई महिना भइसक्यो । घरमा भएको १० मुरी मकै, १० मुरी तोरी र रु. ३२ हजार नगदसहित एकतले पक्की घर बाढीले बगाएपछि आफूसहित पाँचजनाको परिवारसहित छमेकीको घरमा बस्दै आएका छन् ।

‘छिमेकीको घरमा दुई परिवार बस्न निकै कठिनाइ छ, छाप्रो हालेर बसौँ जाडो बढेको बढ्यै छ, घर बनाउन सक्ने क्षमता छैन, बनाउन पनि कहाँ बनाउने घर बगाएको स्थानमा बनाउन हुन्छ कि हुन्न कसैले हेरिदिएका छैनन्,’ तिमल्सिनाले भने ।

तिमल्सिनाले जाडोकै कारण पाल हालेर घर बगेकै ठाउँमा बस्न नसकिएकाले एक दुई महिना शरणमै बस्नुपर्ने बाध्यता रहेको सुनाए । सोही गाउँपालिका– ३ मा घर बगाउँदा श्रीमती र एक छोरा गुमाएका भीमबहादुर शंकर पनि त्यस घटनायता आफन्तकोमा बस्दै आएका छन् । ‘ठुली छोरी पढ्न काठमाडौं बस्छिन्, म काममा हेटौँडा थिएँ, यता घर बगाउँदा सुतिरहेका श्रीमती र छोराको ज्यान गयो, अहिले म आफन्तकोमा बसिरहेको छु, पीडामा त छु नै वासको व्यवस्थापन गर्न नसक्दा चिन्ताले सताइरहेको छ,’ शंकरले भने ।

बाढी, पहिरोले परिवार भत्किएको घटना सम्झिएर उनी भक्कानिँदै बोल्न नसक्ने भए । उता पहिरोले घर पुर्दा एक छोरा र एक छोरी गुमाएका रोशी गाउँपालिका– २ का रूपबहादुर तुम्सिङको बेथा शंकरको भन्दा फरक छैन । भएका दुई छोराछोरी गुमाएका तुम्सिङ श्रीमतीसहित आफन्तकोमा बस्दै आएका छन् । उनी भन्छन्, ‘अढाई महिना भयो घटना भएको पनि । सन्तान वियोगको पीडा असह्य हुने रहेछ । बसेको र सुतेको कुनै पत्ता पाइरहेको छैन ।’ मृतकको नाममा आएको रु. तीन लाखले वासको व्यवस्थापन गर्न नसक्दा दुःख पाइरहेको उनी गुनासो गर्छन् ।

गत असोज दोस्रो साताको बाढी, पहिरोले घरबारविहीन अवस्थामा पुगेको काभ्रेपलाञ्चोकमा हजारौँ परिवार छन् । घरसहित परिवारका सदस्य गुमाएको पनि ७९ परिवार छन् । जो अढाई महिनादेखि छिमेक तथा आफन्तको शरणमा गुजारा गरिरहेका छन् । केही स्थानमा पीडित परिवार पालकै भरमा दिन काटिरहेका छन्। घर, बारी बगाएर बजाडिएको बस्ती तथा बगाएको खेतको नामोनिशान नहुँदा कतिपय परिवार विक्षिप्त अवस्था भेटिन्छन् । जिल्लाको दक्षिणी क्षेत्रस्थित बेथानचोक र रोशी गाउँपालिका तथा पनौती नगरपालिकामा बाढी, पहिरोपीडित जाडोको समयमा कष्टकर जीवन बिताउन बाध्य छन् ।

बेथानाचोक–३ का बाढीपहिरो प्रभावित स्थानीयवासीले यही मंसिर १० गते सुरक्षित वासस्थानसहितको माग गर्दै गाउँपालिकालाई ज्ञापनपत्र बुझाएका थिए । पाँचबुँदे ज्ञापनपत्रमार्फत विनाशकारी बाढी, पहिरोले दुईजनाको मृत्यु भएकाले उनीहरूको परिवारलाई उपयुक्त घरवासको प्रबन्ध गर्न मागसमेत गरेका छन् । अझ भूगर्भविद्को प्राविधिक अध्ययन गराएर स्थायी रूपमा पहिरो नियन्त्रणको व्यवस्था गर्नुपर्ने र बालीनाली लगाउन नहुने गरी पहिरोले पुरिएको बारीलाई पूर्व अवस्थामा ल्याउन गाउँपालिकाबाट सहयोगको व्यवस्था गर्न मागसहितको ज्ञापनपत्र गाउँपालिका अध्यक्ष भगवान अधिकारीलाई बुझाइएको छ । साथै, पीडितले तत्काल जाडोबाट बच्न बसोवास तथा स्थायी पुनर्वासमा समेत पहल गरिदिन आग्रह पनि गरे ।

गत असोजको दोस्रो साताको भीषण वर्षपछिको बाढी, पहिरोमा परी जिल्लामा ७९ जनाको मृत्यु भएको छ भने ६ जना अझै बेपत्ताको अवस्थामा रहेका छन् भने सयौँ परिवार घरबारविहीन बन्न पुगे । ज्यान गुमाउनेको परिवारले सरकारद्वारा प्रदान गरिएको राहत–रकम पाए भने जिल्लाका हजारौँ पीडित परिवार अझै राहतको पर्खाइमा छन् । स्थानीय तहले असोज १० देखि १२ गतेसम्म परेको अविरल वर्षापछिको बाढी, पहिरोले पुर्‍याएको जनधनको क्षतिको यकिन विवरण तयार नगर्दा सरकारले दिन लागेको अल्पकालीन राहत–रकम प्रदान गर्न सकिएको छैन ।

जिल्ला विपत् व्यवस्थापन समितिले गत कात्तिक अन्तिम साता नै बाढी, पहिरोले जनधनको क्षति पुर्‍याएकोबारे छिटो पूर्ण विवरण पठाउन स्थानीय तहलाई निर्देशन दिए पनि त्यसको कार्यान्वयन भएपछि समितिले मंसिर तेस्रो साता पुनः १० दिनको समयसीमा दिएको छ । समितिले स्थानीय तहका जनप्रतिनिधि तथा प्रमुख प्रशासकीय अधिकृतलाई निर्देशन दिँदै क्षतिको पूर्ण विवरण उपलब्ध नगराउँदा तत्कालीन राहत तथा पुनर्वासका लागि राष्ट्रिय विपत् जोखिम न्यूनीकरण तथा व्यवस्थापन प्राधिकरणमार्फत आउने सरकारी राहत उपलब्ध गराउन नसकिएको जनाएको थियो ।

प्रधिकरणको वेबसाइटमा क्षतिको पूर्ण विवरण प्रविष्ट गरी जिल्ला प्रशासन कार्यालय तथा जिल्ला विपत् व्यवस्थापन समितिमा विवरण बुझाउन निर्देशन दिएको सहायक प्रमुख जिल्ला अधिकारी सुवास पौडेलले बताए । उनका अनुसार स्थानीय तहले उक्त विवरण पठाइसकेपछि मात्रै राहत तथा पुनर्वासको कार्यक्रम सुरु हुनेछ । जाडोयाम सुरु भइसकेकाले बाढी, पहिरोपीडितलाई थप कष्ट हुने भएकाले तत्काल क्षतिको विवरण पठाउन भनिएको पौडेलले बताए।

समितिको पटक–पटकको बैठकले विपतपीडित उद्धार र राहतसम्बन्धी (सातौ‌ँ संशोधन) मापदण्ड २०७७ बमोजिम विपतबाट घर, बहाल, आवास नष्ट भएका वा खाद्यान्न–बाली तथा जग्गा जमिन वा पसल व्यवसायसमेत नोक्सानी भई तत्काल गुजाराका लागि खाद्यान्नसमेत नभएका वा दुवै अवस्थामा पीडित परिवारलाई यथाशीघ्र प्रतिपरिवार पाँच जनासम्मको हकमा रु. १५ हजार र सोभन्दा बढी सदस्य भएको हकमा रु. २० हजारका दरले नगद जिल्ला विपत् व्यवस्थापन कोषबाट उपलब्ध गराउने निर्णय गरिसकिएको छ ।

समितिद्वारा अस्थायी आवास निर्माणका लागि रु. ५० हजार उपलब्ध गराउने मापदण्डअनुसारको विवरणसमेत स्थानीय तहसँग माग गरिएको छ । ‘स्थानीय तहलाई क्षतिको पूर्ण विवरण उपलब्ध गराउन पटकपटक अनुरोधसहित पत्राचार गरेका थियौँ, नआएपछि पुनः मंसिर २० गते १० दिनको समयसीमा दिएका छौँ,’ पौडेलले भने । उनका अनुसार सरकारले प्रारम्भिक क्षतिका आधारमा वर्गीकरण गरी पठाएको स्थानीय तहस्तरको अनुदान भने कार्यालयले गत कात्तिक १४ गते नै पठाइसकिएको थियो । प्राधिकरणको पत्रसहित नेपाल सरकारबाट संकटग्रस्त क्षेत्र घोषणा भएका स्थानीय तहलाई रकम उपलब्ध गराइएको हो ।

यसैबिच, गत असोज दोस्रो साताको बाढी तथा पहिरोमा बेपत्ता भएकाको परिवारलाई मृतकसरह राहत दिइने जिल्ला विपत् व्यवस्थापन समितिले जनाएको छ । समितिले जिल्लामा बेपत्ता ६ जनाको परिवारलाई राहत दिइने जनाइएको हो । ०८१ असार ३१ गते मन्त्रिपरिषद्को बैठकमा बाढी, पहिरोमा बेपत्ता भई १० दिनसम्म पनि फेला पर्न नसकेका, तर यकिन भएकाको हकमा मृत्यु भएसरह राहत उपलब्ध गराउने निर्णयअनुसार समितिले जिल्लाका बेपत्ताको परिवारलाई सो राहत दिने निर्णय गरेको हो ।

समितिका अनुसार बाढी, पहिरोको घटनामा बेपत्ता हुनेमा तेमाल गाउँपालिका– २ की ६ वर्षीया अप्रिया तामाङ र तीन वर्षीया प्रिया तामाङ, चौँरीदेउराली गाउँपालिका– ६ की ४० वर्षीया शान्ता रिमाल, धुलिखेल नगरपालिका–८ की ४२ वर्षीया गीता श्रेष्ठ, बेथानचाेक गाउँपालिका–४ की ज्ञानु परियार र खानीखोला गाउँपालिका–६ की देवीमाया स्याङतान रहेका छन् ।

बेपत्ताका परिवारलाई प्रतिमृतक रु. दुई लाखका दरले संघीय सरकार तथा प्रदेश सरकारसमेत राहत दिइने निर्णय गरिएको समितिको संयोजक एवं प्रमुख जिल्ला अधिकारी उमेशकुमार ढकालले जानकारी दिए । बाढी, पहिरोबाट जिल्लाका ७९ जनाको मृत्यु भएको थियो । समितिले जाडोको मौसम सुरु भइसकेकाले बाढीपीडितका लागि न्यानो कपडालगायतका सामग्री उपलब्ध गराउनेसमेत निर्णय गरेको थियो । जिल्लाको ११ स्थानीय तहमा रु. नौ करोड २५ लाख अनुदान उपलब्ध गराइएको जनाएको छ । यस्तै, केन्द्रीय सरकारका तर्फबाट ज्यान गुमाएका परिवारलाई यसअघि नै प्राप्त रु. दुई लाखका दरले रकम उपलब्ध गराइसकिएको जिल्ला प्रशासन कार्यालले जनाएको छ ।

यसैबिच, नमोबुद्ध नगरपालिकाको ८४५ बाढी, पहिरोपीडितलाई संयुक्त राष्ट्रसंघीय बालकोष (युनिसेफ)द्वारा प्राप्त सहयोग रकमबाट राहत विरतण गरिएको छ । प्रभावित परिवारलाई युनिसेफले नगरलाई एकमुस्ट रूपमा उपलब्ध गराएको रु. एक करोड ५० लाख ४० हजार पाँच सयबाट नगरले वडागत रूपमा पीडित परिवारलाई प्रदान गरेको हो । नगर प्रमुख कुन्साङ लामाले युनिसेफबाट प्राप्त आर्थिक सहयोगबाट सबै वडाका विपत् प्रभावितलाई राहत–रकम प्रदान गरिएको बताए । नगरका ४५३ प्रतिपरिवारले रु. १५ हजार तथा ३९२ परिवारले रु. २० हजारका दरले राहत रकम पाएका हुन् । युनिसेफबाट राहत रकम प्राप्त गर्ने परिवारले संघीय सरकारबाट घोषित अल्पकालीन राहत भने पाउने छैनन्।

बाढी, पहिरोबाट नगरका ५३० घर पूर्ण तथा ३१५ घर आंशिक रूपमा क्षति भएको जनाइएको छ । नगरका अनुसार बाढी, पहिरोबाट तीन हजार ३८५ जना प्रभावित भएको जनाइएको छ । यस्तै, बाढी, पहिरोले नगरको एक विद्यालय पूर्ण तथा ४७ विद्यालयमा आंशिक क्षति पुगेको छ भने ११९ खानेपानी आयोजनामा क्षति पुगेको छ । युनिसेफले यसअघि काभ्रेपलाञ्चोककै बेथानचोक गाउँपालिकाको दुईवटा वडाका २६९ परिवारलाई राहत–रकम प्रदान गरेको थियो भने केही दिनभित्र मण्डनदेउपुर नगरका करिब नौ सय परिवारलाई उक्त राहत–रकम प्रदान गर्ने जनाएको छ ।

विशेषगरी ठुलो क्षति पुगेका जिल्लाको दक्षिणी क्षेत्रमा अवस्थित पनौती नगरपालिका तथा बेथानचोक र रोशी गाउँपालिका खोज, उद्धार तथा राहत व्यवस्थापनपछि पुनर्वास एवं आवास निर्माणका लागि यकिन तथ्यांक संकलन कार्यमा लागेको जनाएका छन् । कृषि–पशु, शिक्षा, सडक, सञ्चार तथा विद्युतका क्षेत्रमा क्षति पुर्‍याउँदा स्थानीय नागरिकले कष्टकर जीवन बिताउन बाध्य बन्नुपरेको हो । घटनाको दुई महिना बितिसक्दा पनि जिल्लामा मानवीय क्षतिबाहेक अन्य विविध क्षतिबारे पूर्ण विवरण संकलन हुन सकेको छैन । जिल्लाको बनेपा र धुलिखेल नगरबाहेक ११ स्थानीय तहलाई नेपाल सरकारले संकटग्रस्त क्षेत्र घोषणा गरेको छ ।

जिल्लाका १३ स्थानीय तहमा कुन स्थानीय तहमा कति क्षति भयो भन्ने आधिकारिक विवरण जिल्लास्थित कुनै पनि सरकारी निकायसँग छैन । जिल्ला प्रशासन कार्यालयको प्रारम्भिक विवरणअनुसार भने जिल्लामा दुई हजार ८४४ घर पूर्ण र ६ हजार ४६ घरमा आंशिक क्षति पुगेको छ । त्यस्तै, तीन हजारदेखि ३५ सय घर पुनर्निर्माण गर्नुपर्ने देखिएको प्रारम्भिक विवरणमा उल्लेख गरिएको छ ।

तीन दर्जन सरकारी भवन तथा साही संख्यामा सार्वजनिक भवन पूर्ण रूपमा क्षति भएको जनाइएको छ । जिल्ला विपत् व्यवस्थापन समितिले भने बाढी, पहिरोले पुर्‍याएको जनधनको यकिन विवरण नबुझाएकाले सरकारद्वारा तत्कालीन राहत तथा पुनर्वासका लागि राष्ट्रिय विपत् जोखिम न्यूनीकरण तथा व्यवस्थापन प्राधिकरणमार्फत आउने सरकारी राहत उपलब्ध गराउन नसकिएको जनाएको छ ।

यसैबिच विपत् व्यवस्थापनका लागि जिल्लाका स्थानीय तहले चालू आर्थिक वर्षको बजेट विशेष अधिवेशनको आयोजना गरी संशोधन थालेका छन् । गत असोज दोस्रो साताको बाढी, पहिरोका कारण जिल्लामा जनधनको ठुलो क्षति भएपछि राहत तथा पुनर्वासका लागि यहाँका स्थानीय तहले विनियोजित बजेट कटौती गर्न थालेका हुन् । हालसम्म जिल्लास्थित रोशी र बेथानचोक गाउँपालिकाले विपत् प्रभावितको राहत, पुनर्स्थापना एवं पुनर्वासका लागि चालू आवको बजेट संशोधन गरी विपत् कोषमा बजेट व्यवस्थापन गरेका छन् ।

जाडोयाम सुरु भइसकेकाले गाउँपालिकाले तत्काल बाढी, पहिरो प्रभावितलाई थप राहात प्रदान गर्न गाउँसभाको विशेष अधिवेशनले छुट्टै बजेट व्यवस्थापन गरेको जनाइएका छन् । बेथानचोक गाउँपालिकाले विशेष गाउँ अधिवेशनको आह्वान गरी चालू आवमा विनियोजित रु. ६४ करोड १२ लाख बजेटमा रु. नौ करोड ३१ लख ८७ हजार कटौती गरी विपत् व्यवस्थापन कोषका लागि छुट्याएको छ ।

यस्तै, रोशी गाउँपालिकाको १५औँ अधिवेशनले बाढी, पहिरोले ठुलो जनधनको क्षति पुर्‍याएपछि चालू आवको योजनाका लागि विनियोजित बजेटबाट केही प्रतिशत कटौती गरी विपत् व्यवस्थापन गर्न गत कात्तिक ३० गते नै निर्णय गरेको छ । गाउँपालिकाले विपतसँग सम्बन्धित बनाएर २६६ योजना संशोधन गरेको छ भने विपत् कोष रु. दुई करोड ८० लाखको बनाएको छ ।