- वि.सं २o८१ मङ्सिर २६ बुधबार
बाजुराको गौमूल गाउँपालिका– १, दुर्गालीकी शर्मिला रोकाया मात्र १४ वर्षकी भइन् । तर, उनको काँधमा पाँच बहिनीको पूर्ण जिम्मेवारी छ । ११ वर्षकी सविना, नौ वर्षकी सरला, सात वर्षकी संगीता, पाँच वर्षकी सृष्टि र तीन वर्षकी समृद्धिको एक मात्र अभिभावक हुन् शर्मिला ।
०७७ मा भिरबाट लडेर बुबाको मृत्यु भएको केही समयमै आमाले पनि अर्कैसँग विवाह गरेपछि ६ दिदीबहिनी बिचल्लीमा परेको वडाध्यक्ष देविन्द्रबहादुर रोकायाले बताए । आफ्नो घर पनि नभएका उनीहरूले गाउँलेको पुरानो कच्ची घरमा आश्रय लिएका छन् ।
पेटभरि खान नपाएका आफूहरूलाई पढ्ने अधिकार त सपना लाग्न थालिसकेको बालिकाहरू बताउँछन् । कलिला बालिकाहरू यत्रो बिचल्लीमा पर्दा पनि स्थानीय सरकारदेखि कुनै सरकारी तथा गैरसरकारी संघसंस्थाले वास्ता गरेका छैनन् ।
