काठमाडौं–निजगढ द्रुतमार्ग निर्माण ताेकिएकै समय सम्पन्न गर्न सरकारलाई निर्देशन
संघीय संसदको राज्य व्यवस्था तथा सुशासन समितिले जनताको न्यायोचित मागलाई तत्काल सम्बोधन गरी काठमाडौं–निजगढ द्रुतमार्ग निर्माणको काम ताेकिएकै समय भित्र सम्पन्न हुनेगरी प्रभावकारी ढंगले अघि बढाउन सरकारलाई निर्देशन दिएको छ ।
समितिको शुक्रबार सिंहदरबारमा बसेको बैठकले खोकना र बुङमतीका जनताको जग्गाको मुआब्जा, स्थानीय सम्पदाहरुको संरक्षण गर्नुपर्ने लगायतका न्यायोचित माग तत्काल सम्बोधन गरी सो दू्रतमार्ग निर्माण कार्य समयमै सम्पन्न गर्न प्रधानमन्त्री तथा मन्त्री परिषद कार्यालय, रक्षा मन्त्रालय र गृह मन्त्रालयलाई निर्देशन दिएको हो ।
जनताको न्यायोचित मागलाई तत्काल सम्बोधन गरी द्रर्तमार्ग निर्माणको कामलाई तोकिएकै मितिमा सम्पन्न गर्न सरकारलाई निर्देशन दिइएको समितिकी सभापति शशी श्रेष्ठले जानकारी दिइन् । खोकनामा सो द्रुतमार्गको कामलाई अघि बढाउन एकीकृत योजना तय गर्न पनि सरकारलाई सचेत गराइएको छ । समितिकी सभापति श्रेष्ठले राष्ट्रिय गौरवको सो द्रूतमार्ग निर्माण कार्यलाई प्रभावकारी बनाउने गरी अन्तर मन्त्रालय समन्वयमा जोड दिन सरकारको ध्यानाकर्षण गराइन् ।
समितिले खोकनाका जनताको माग सम्बोधन गर्न ढिलो भएमा यसले विकराल रुप लिन सक्नेतर्फ पनि सरकारलाई सचेत गराएको छ । स्थानीय जनताको मागलाई सरकारले उच्च प्राथमिकता दिएर सम्बोधन नगरे सो द्रूतमार्ग निर्माण हुन नदिन षडयन्त्र हुन सक्नेतर्फ समितिकी सभापति श्रेष्ठले बताइन् ।
करिब एक खरब १६ अरब लागत अनुमान गरिएको सो दू्रतमार्गको निर्माणको जिम्मेवारी नेपाली सेनालाई दिइएको छ । बैठकमा समितिका सदस्यहरुले सो दू्रतमार्गको निर्माण लागत बढन नदिन सरकारको ध्यानाकर्षण गराएका छन ।