संसदमा दर्ता भएको मिडिया काउन्सिल सम्बन्धि विधेयकमा भएका प्रेस स्वतन्त्रता विरोधी प्रावधान संशोधन गर्न माग राख्दै आन्दोलनरत नेपाल पत्रकार महासंघले दोस्रो चरणको आन्दोलनका कार्यक्रम सार्वजनिक गरेको छ ।

पहिलो चरणको आन्दोलन सम्पन्न हुँदासमेत महासंघले उठाएका जायज मागप्रति सरकार गम्भीर नभएको भन्दै दोस्रो चरणको आन्दोलन घोषणा गरेको हो । सो विधेयकमा रहेका प्रेस स्वतन्त्रता विरोधी प्रावधान विरुद्ध देशव्यापी प्रदर्शन गर्नेलगायतका विरोध कार्यक्रम महासंघले सार्वजनिक गरेको छ ।

महासंघका महासचिव रमेश विष्टले आइतबार जारी गरेको विज्ञप्तीअनुसार ६ देखि २५ जेठसम्म चरणवद्ध आन्दोलन हुने जनाइएको छ । संसदमा प्रतिनिधित्वगर्ने पार्टीको ध्यानाकर्षण गराउने, सांसदसँग भेटघाट, र बानेश्वरदेखि बबरमहल सम्म र प्रदेश राजधानीमा मानव हातेसाङ्लो बनाई प्रदर्शन गर्नेलगायतका विरोध कार्यक्रम महासंघले गर्ने भएको हो ।

सो विधेयक संसदमा पेश हुने दिन आकस्मिक रुपमा देशव्यापी विरोध प्रदर्शन गर्ने पनि विज्ञप्तीमा जनाइएको छ ।