कबड्डी फिल्मको दोस्रो सिक्वेल कबड्डी कबड्डी कबड्डी निर्माण हुने भएको छ । रामबाबु गुरुङले निर्देशन गर्ने फिल्मको सोमबार राजधानीमा प्रेसमिट गरी घोषणा गरिएको हो । दयाहाङ राई, कर्मा, उपासना सिंह ठकुरी, बुद्धि तामाङ, विल्सनविक्रम राई, अरुणा कार्की, विजय बराल, कमलमणि नेपाल, रिश्मा गुरुङ, माओत्से गुरुङलगायतका कलाकारले अभिनय गर्ने फिल्मको निर्मातामा मणिराम पोखरेल, अर्जुन कार्कीलगायत छन् ।
अन्तरजातीय प्रेम र विवाहको खिचातानी प्रस्तुत गरिने फिल्मको कथा निर्देशक रामबाबु र उपेन्द्र सुब्बाले लेखेका हुन् । जेठ पहिलो साताबाट सुटिङ थालिने फिल्म तिजको अवसर पारेर प्रदर्शन हुन सक्ने निर्माण पक्षले जनाएको छ ।